Manchester United head coach Ruben Amorim chuan Bruno Fernandes-a chu tun nipuiah a chhuah a phal dawn lo tih a hrilh.
Club captain Fernandes hian August thlaah khan contract pawt seiin kum 2027 thleng hun a la nei a, tun season-a United tana che tha ber a ni.
Kartawpah khan kum 30 mi hi Real Madrid-a insawn tur angin thu a thang a ni.
“Ni lo, chutiang chu a thleng lo vang,” tiin Thawhlehnia Premier League-a Nottingham Forest an tlawh tur puala thuthar lakhawmtute a kawmnaah Amorim-a hian he titi chungchanga zawhna hi a chhang.
A chhuak dawn lo tih chu a chiang thawkhat em tih zawh belhna pawh Sporting coach hlui chuan, “Khawiah mah a kal dawn lo, chu chu amah pawh ka hrilh tawh,” a ti.
Fernandes hian tun season kal mekah hian inelna hrang hrangah goal 16 a thun tawh a, United player dang zingah goal 10 thun tling dang an awm lo.
Tun hnaia ram leh ram inkhelh chawlh hma lawk khan Fernandes-a hian goal nga a thun a, Europa League last-16-a Real Sociedad hneh tuma hattrick a siam nghe nghe.
Tun season-ah Mohammed Salah (54) leh Erling Haaland (33) tih lih chu Fernandes (31) aia goal leh mi dang siamah Premier League-ah thawh hlawk an awm rih lo a ni.
United hi league-ah 13-na niin pathumna Nottingham Forest an tlawh.