Chawlhkar hnih chhung ram leh ram inkhelh avanga an chawlh hnuah Premier League a lo kir leh ta.
A chung berah Arne Slot-a kaihhruai Liverpool chu Arsenal aiin point 12-in an sang dal tawh a. Engtikah nge nomawi chawi thei dinhmunah an din ang tih chu ngaihchan a ni tawh.
Liverpool hian point 70 hmu tawhin anmahni hnaih bertu hian an khelh hmabak vawi kuaah hnehna an chan vekin point 85 an la hmu thei.
Chuti a nih chuan Reds hian point 27 la hmuh theihna inkhelh hmabakah point 16 an hmuh chuan a vawi hnih nan Premier League leh English champion vawi 20 nan nomawi an la dawn tihna a ni.
Khelh kuaah point 15 chauh pawh hmu sela Liverpool hi goal difference-ah Arsenal aia an that fal em avangin champion thei an ni bawk. Reds hian +42 leh Arsenal-in +29 an nei mek.
Hetianga chhut hian Slot-a team hian Gunners lakah hian vawi li chak chiah an mamawh tawh tihna a ni.
Ram leh ram inkhelh chawlh hma chiah khan Arsenal-in Emirates Stadium-ah Chelsea hnehin Liverpool aia an khelh tlemna a awm ta bik lo.
He hnehna hian Liverpool-in point 15-a hma an hruaina chu 12-ah a tihniam bawk a; mahse, hei hian Slot-a team-in nomawi an lakna tur a dalna a tam lem lo nia ngaih theih a ni.
Liverpool-in a vawi 20 nana league nomawi an lak theih hun hma ber chu April 13 a ni dawn a, Anfield-a West Ham an mikhual hunah a ni.
Hetiang thleng tur erawh chuan Arsenal-in Fulham leh Everton an hneh loh leh Liverpool-in Everton leh Fulham an hneh a ngai ve thung.
Hetiang hi a thleng a nih chuan a bak inkhel vawi sarih an la neihah point 21 chauh hmuh theih awm tawhin Arsenal-in point 18-in Liverpool an phak lo dawn tawh a ni.
Brentford-in April 12-ah Arsenal an hneh zui leh bawk chuan Gunners hian khelh hmabakah point 18 chuah hmuh theihna an nei tawh dawn a, Liverpool-in a tukah Hammers laka point an hmuhin an champion thei tawh dawn a ni.
Statistician Opta chuan Arsenal hi nomawi lak theihna chance an neih chu 0.8% chauh a ni tawhah a dah a, Liverpool hian chance 99.2% an nei tawh niin a dah a, chiang khatah a ngai tawh.