- Dr. JT Vanlalngheta, Ziak Mi Run
Vanglaini Chanchinbu 26.3.25 chhuaka mi pakhat thu ziahah khan Kutbûli an fiam thu a lo lang tel a, a then a zâr tlêm ka’n târ lang ang e. ” …………….Khatla Sabînga lung vêl atang sâwn Kutbûli kan tih mai thin kha kan hmaah hian puan têl ak luah chung hian a kal a, naupangin an chhaih ang deuhin a puanah chuan ka va vawm a. A rawn leh hawi vut a, keiniho kha khatianga chhaih awm hmêl kha niin min hmu si lo va………….Pu H. Raltâwna pawhin, “Ti ti suh u, inti khawngaihthlak ,” a ti a. ” Vawi khat chauh,” ka ti a, lungtê ka chhar leh a, ka tih lai tak khan a lo hawi thut a, mi rawn man ta. ” Kha, khalaia kawr tial ha kha, kawtha lovin thi rawh se,” min rawn ti ta nghek mai a, kan nui zo ta hlawm a,” tih lai hi duh tâwk ila. A ngaihnawmin lung lam lam pawh a ti lêng e.
Chutih laia rilrua lo lang chu, Kutbûli chunga Dawrpui pa Pu Thangridema (Evangelist Rev Dr Vanlalnghaka Shillong pu zawn) ngil neihzia sawi hat hat thin hi han sawi lan ve a châkawm thung a. Hmun ren vangin, mi ang lo leh mi harsa dangte chunga an chhungkaw ngil neihna chu sawi lo ta ila.
Tawng thu chhe lo vah, Kutbûli chungchang hi sawi vak a ngai lo vang: mi ang lo, tawp êm êm mai a ni. Mi ten chhe deuh tan phei chuan amah hmuh ringawt pawh, luak ti chhuak thei a ni hial mahna. Amaherawhchu he ka sawite chhûngkua hian an inah chaw an eipui fo mai ni lovin, a hran pawha chaw eitir lovin, an bulah, chaw ei dawkân pakhatah chhungkaw member zinga mi ang maiin an eipui thin hi ziah lan loh atân chuan a uiawm deuh va. Anni ang hian tunlaia kohhran hrang hranga rawng bawltute hian kan ti ve thei ang emt Hnap nen, chilthlî nên a ni nuai mai si; tenna pakhat mah nei lo va, Kutbuli an lo ûksak thin hi an ngaih sân awm a ni, an chhungkaw hmêlah Isua a lang chiang ngawt mai; Mi ang lo te laka ‘pa tling leh pa tling,’ ‘nu tling leh nu tling’ thinlung put dan hmang lo lan chhuah dân hi a lo inan loh theih dâwn mang e; lan dana kristian tha, fel leh khawngaihna nei hmêl tak, rilru chhûngrilah erawh danglam tak si hi awm theih a ni ang, Isua zuitu anga lang nu tling, kohhran hmeichhia, Kohhran Upa, pa tling, TKP, KTP, adt hi a lo inan loh theih viau dawn a lo ni tih rilruah a lo lang a. Mahse, kan Lalpa Isua chuan amah kan hmangaih leh hmangaih loh tehna zîngah mi ang lo te, mi harsa te kan hmangaih leh hmangaih loh hi a tel tlat si. Tunlai thleng pawh hian he thu kan ziah hi inen fiah nân hmang ila a tha âwm e. Hêng mi tête zînga pakhat pawh hi hmusit lo tûrin fimkhur rawh u (Mathai18.10) Mi â chawi mawi chu lung intiang chunga lunghlu ip ang a ni (Thufingte 26.8). Tih tak meuhvin, tih tak meuhvin ka hrilh a che u, hêng ka unau tê berte zînga mi pakhat chunga in tih chu ka chunga ti in ni (Mathaia 25.40).
Bul tan nana ka hman rawn a ziaktu hian a tak chuan a lo tanpui tawhin a khawngaih hle pawh a ni thei; kan hre lo va, fiamthu a nih angin kan dem lem lo bawk. Chutih laiin, he thu ziah atanga mi hnuaihnungte laka mihring rilru put hmang tlangpui danglam theih dan erawh a lang ruak thei a.
Lal Isua zirtirna êng atanga chhût chuan, mi chanhaite leh rualban lote mi pangngaite kan fiam ang ni lova fiam hi a Pathian thu lo vang a, chu ai chuan, kan fiam duh a nih pawhin, mi pangngai anga fiam ve mai tûr niin a lang a.