Aizawl: Mizoram Larsap General Vijay Kumar Singh chuan Inria ram ang, ram zau leh hnam ziarang hrang hrang awmnaah inpumkhatna vawn nun tlat a pawimawh thu a sawi.
Thawhtanni khan ‘Ek Bharat Shreshtha Bharat’ hmalakna hnuaiah Mizoram Larsap General Singh hovin Bihar, Rajasthan leh Odisha-te State puitlinga hlan kai ni, ‘Foundation Day’ lawmna Durbar Hall, Raj Bhavan, Aizawlah buatsaih a ni a. He hunah thu sawiin larsap chuan state pathumte dinchamphaphak pual chibai bukin duhsakna a hlan.
Larsap chuan Ek Bharat Shreshtha Bharat hmalakna chuan India rama hnam ziarang hrang hrangte a chawimawi bakah zahawmna a vawn himsak tih sawiin, “He hmalakna hiam khua leh tuite inkarah inpawhtawnna leh inhriatthiamtawnna tihchak deuh deuh a tum a ni,” a ti a. India ram ang ram zau leh hnam ziarang hrang hrang awmnaah inpumkhatna vawn nun tlat a pawimawh thu sawiin, “State hrang hrang atanga kalkhawmin kan hnam ziarang leh tihdan phungte kan pho chhuak hian ‘Ek Bharat Shreshtha Bharat’ thil tumte a takin a lantir a ni,” a ti.
Larsap chuan India rama state tinten history hranpa theuh an nei tih sawiin, “Hnam ziarang leh nunphungte kan inhriatpawh tawn hian India ram inpawh leh nghet kan siam thei a, hetiang programme buatsaih hi ram chak zawk leh inpumkhat siam nana pawimawh tak a ni,” a ti bawk.
Addl. PS to Governor Lalhruaitluangi kaihhruai inkhawmah hian Bihar Larsap Arif Mohammed Khan leh Odisha Larsap Dr. Hari Babu Kambhampati te thuchah bakah state pahthumte chanchin tar lanna video tawi thlir ho a ni a. Dr. Akhilesh Kumar Sharma, Assistant Professor, Mizoram University leh Prof. Rabindra Kumar Mohanty, HoD, Sociology Department, Mizoram University ten Rajasthan leh Odisha state-te chanchin tawi an sawi bawk.