- Dr. C. Lalrampana
A KAMKÊUNA
Aizawl treasury office, hi May 1975 khan din tan a ni a. Chutih lai chuan hetiang ang hian mihring kan la tam lova dawrtu pawh an la tlem hle. State puitling kan nih hnu hian mihring kan lo pung ta a, tunah chuan Aizawl North Treasury hial din a lo nileh ta. Hmasawnna ropui tak pakhat a ni a, alawmawm hle.
TREASURY BAZAR
Aizawl treasury Office hi a lûn thin hle a, pisa kai haw leh dawrtu veivak an thahnem hle thin. Hei vang hian kum 1995 vel atang khan DI&PR Office leh Tennis Court inkar kawng zimteah hian Bazar ang deuha thut tan a ni thin a, Tuikual, venghlui, Khatla leh pisa kai haw lam leh pisa dawr haw lamte’n inchhung mamawh, chiseh leh chawhmeh ilo lam pah nan a remchang hle a, hei vang hian helai hmunah hian chhiatna (man-made disaster) a lo thleng nual tawh thin mah se, kum 30 zet bazara thute hian an lo luahlum tawh a ni.
BAZAR THAR TUR
Vanduaithlak takin March 17, 2025 zing khan Treasury Bazar chu a kang palh hlauh mai a. A tuk 18,2025 khan a kâng senghawi hnatlang chu Bazar-a thute’n an thawk a, an fakawm takzet a ni. Venghlui Local Council leh Tuikual South Local Council-te chuan a kan ni khan thuchhuah intawm an siam a, hetah hian Treasury bazar-a kangmei chhuak avanga tuartu nitin eichawp zawngte an tawrhpui thu leh pawi an tih thu an tarlang a. Chutihrualin Bazar hi tha zawka chinfel thuai a nih theih nan kangmeiin a tichhiat sawrkar department te bungrua senghawi leh siamthat hna thawh bak chu tumahin kut lo thlak rih lo turin ngenna an siam a ni. Hetihlai hian AMC chuan an Gate hi zan lamah an kalh a. Treasury Bazar-ah hian thut an phal rih lo a ni. Treasury Bazar kâng hi a kan tuk chawhma khan AMC Mayor Lalrinenga Sailo chuan a tlawh a, helai hmun hi bazar atana hman leh tura siam that tum a nih tawh loh thu a sawi. Treasury bazar Venghlui area lamah hian dawr 53 a awm a, 35 chu a kang chhia a, Tuikual South lamah dawr 41-ah dawr 29 a kang chhe bawk a ni. Treasury bazar kang tuartu hi dawr 55 a tling. A hungna pal chim leh bomb puak avangin chhiatna a lo thleng tawh bawk.
A TLÂNGKAWMNA
Treasury bazara thute hian helai hmun hi eizawn nan ber an hman avangin an tuar nasa hle a, he Bazar-ah hian thutna nei mi 102 lai awmin mi 55-in chhiatna hi an tuar a, cheng tam tak an chân a ni. Hei vang hian AMC chuan he bazara eizawngtute tan hian Tuikual South-a AMC Multi-Complex hmun remchang leh thâwl nuam zawk a buatsaihsakah thutna a pe vek a, hetah hian insawn turin a ngen a ni. AMC ngenna hi Treasury Bazar Association (TBA) member 102-te hian thuawi takin an pawm thiam niin a lang a, an fakawm takzet a ni. Hetih rual hian dan lova kawngsira thu chawhmeh zuar leh sumdawng dang (wayside vendor) zawng zawngte pawh thuttir tawh bik lovin an awmna tur ruahmansak ve nghal vek se an duh thu an sawi. TBA thlir dan hi a dik hle. A nihna takah chuan Tennis Court leh temple inkar Agriculture office paltlang kawngpui, inrinni apianga zawh theih lova Road Tax chawi thin lirtheite chawhmeh zuarin an han luahlan hmiah zel mai hi chu smart city kalphung tur chu a ni lo tawp mai! TBA hovin thuawi taka an hmun tha leh hlawk zawk, awlsam zawk tlansana engkim huama an thuhmun an sawn tur hi ram rawngbawlnaah an chiang hle niin a lang. Chuvangin, AMC hian dan lova kawng sira thil zuar (wayside vendor) zawng zawngte hi a rang thei ang berin an thutna tur siamsakin sawn vat vat se kan Aizawl khawpui pawh hi A thianghlimin a felfai zawk ang a, smart city nih pawh kan inhmeh sawt dawn a ni.