- K. Hmingthankaia
Nizan, 26.3.2025 ka muhil theilo lehkha ka chhiar peih bawk si lovin, ka chin than vak loh Yubtube ka en mai mai a. Tunhnaia Khawhri khuaa ruihhlo an man chungchanga Alpha Mizo Production channel leh Khawhri YMA President inbiakna ka ngaithla fuh hlauh mai a. Chuta ka rilrua lo awm chu –
Khawchhak lam atanga ruihhlo leh kuhva leh dan lova thil lo lut tam lutuk dang tur hian, Kohhran leh NGO lian tak takte, pawl hrang hrangte, Police leh Exise-te, a changtu Minister ve vete, Chief Minister leh a Sawrkar leh mipui hian thawm kan neih rin tehlul nen, bakah, helam atan hian sum eng eng emaw pawh kan vawrh viau emaw tih laiin, kan lo la ti tak tak loin, ka lo va nep ve ka ti a ni.
Heti khawpa a ram pumpui tibuaitu, manganna nasa tak thlentu do tur hian, finna leh rem hriatna thuk tak hmangin, mi nawlpuiin kan hriat bak, a theih dan zawng zawnga dang chat turin Strategy tha tak tak in duang tawh ang chu tih laiin, Seling-Champhai kawngpui pangngai ngawr ngawr chauh hi kan lo la tinzawn em ni le?
YMA President meuh thusawi chu ring ngam ila. A sawi dan chuan- Mizoram chhimchhak khaw hrang hrang atangin Burma lam atanga lo luhna ‘Khan’ tha tak tak a awm teuh a. Chung khua atanga lo lut zawng zawngte chuan pumpelh theih miah lohin Khawhri khua hi an paltlang ngei ngei a ngai. Thingsai phei chu Khawhri atangin km 30 lek, Tiau lui hnaih tea awm a ni. Kawng lah chu Tiau thlengin tha taka blacktop vek tawh a ni. He lam kawng, thingtlang khaw tereuh te te lamah hian lirthei chi hrang hrang, truck lianpuipui nen, chhun zanin an tlan reng thin a ti.
Seling-Champhai a ralmuan loh avangin smugler ho hi helamah hian free takin an kal thin a ni awm e. Tuna an mi mante ngei pawhin he lam kawng hi a free vanga kal an nih thu an sawi ati. Truck lo kalte pawh, khawi atanga lo kal nge an nih tih an zawhin, Champhai lam atangin an ti thin a ti. Helamah hian Burma kal khan tha tak tak a awma, mahse, chung zawng zawng chuan Khawhri khaw tereuh te hi an paltlang ngei ngei a ngai a ti.
Heti khawpa lo channa khan tha Khawhri khuaah hian engatinge tun thlenga eng department mahin Out post emaw, check post emaw an la siam loh mai chu le? A khaw mite pawhin thuneitute an lo hrilh hre thin tawh, mahse, uksak an hlawh ngai lo a ni awm e. Annin phalna, search warrant neilova lo tih ve ngawt fo chu dan bawhchhiat hlauhawm bawk si, thingtlang mahni hna thawh ngai bawk nen, ringhlel tak leh pawiti tak chungin an enliam leh mai thin a ni awm e. A dik a ni, BJP sawrkarin vaitawnga dan thar eng eng emaw a siam hnu phei hi chuan, thil tha kan ti emaw kan tih laiin, kan tum loh deuhin na takin mahni kan in pal awk thei tlat si a. Pawisa a awm dawn phawt chuan, smugler leh thil sual titu lama tang chak dan hremi leh roreltu an tam bawk si a.
Hmeichhiate humhimtu, Lal ropui leh huaisen Zakapa khua, Khawhri khuaah hian Sawrkar ngei hian, smugler ho dan chah nan rang takin out post leh check post siam rawh se. A khaw mite pawhin an pui chak em em ang. Tun tuma an man pawh Police kan fak hlauh, Police chu fimkhur thu hlaah a khaw miten an pun chauh a ni.
Ruihhlo leh sual kan donaah hian, ring tak taka tlangau luai luai lo hian, fim tak leh fing takin, fimkhur tak leh uluk taka kiltin dapa, do dan tur, strategy tha kan duana, huai taka kan bawhzui a ngai tawh a nih hi.