Vawk pul hri, African Swine Fever (ASF) in nasa takin min nuai tawh a, covid hri leng vanga kan buai lai tho khan he hri hian min luhchhuahin, kan vawk vulh thahnem tak an thi bawk a nih kha.
Kha ASF kha a lo la reh hlen reng reng lo mai a, tunah hian Mizoram chhung hmun hrang hrangah a leng leh tan mek. Hri hi reh hlen a nih miau loh avangin a khat tawkin ASF vang hian kan vawk vulh an thi ta fo a, tun hnaiah phei chuan a rawn zual leh tawh niin a hriat.
Vawksa duh leh ei nasa kan nih avangin hriatchian ngei lei hram hram zel tum lehzual ila, vawksa leh vawksa atanga siamchhuah thil dang lei leh ei kawngah pawh i fimkhur zual deuh deuh teh ang u.
Hri leng kha a la reh miau loh avangin mitin kan fimkhur lehzual a tul a, hmun hran atanga vawk lalut lo tur leh hriatchian loh vawksa leh vawksa atanga siamchhuah kan lei loh ngam leh sumdawngte pawhin an lakluh loh ngam rih a tul hle.
Miin sum tam tak sengin eizawn nan vawk an vulh a, an thawhrim rah tur engmah lova chantir thei reng kan ni tih hriain, i fimkhur lehzual ang u.