2024-25 chhungin thisen unit 34,725 pe

Aizawl: Sorkar sum kum (Financial year) 2024-25 chhung khan Mizoramah a thlawna thisen unit 34,725 pek a ni a. Hei hi thisen pek zawng zawng atangin zaa 93.71 a tling.

Mizoram puma thisen pek dinhmun chhinchhiahtu Blood Transfusion Service, Mizoram State AIDS Control Society (MSACS)-in an chhinchhiah danin, April 1, 2024 – March 31, 2025 chhung khan Mizorama blood centre 11-ah thisen unit 34,752 pek a ni a, chung zinga unit 32,566 chu pek bik nei loa a thlawna pek (voluntary donation) niin, heihi thisen pek zawng zawng zaa 93.71 a tling. AVBD, Mizoram-in hemi hun chhunga voluntary blood donation percentage zat thlen tum (target) an siam, zaa 92 aiin a sang a ni.

Kum 2024-25 chhung hian blood centre hrang hrangten blood donation camp vawi 611 an buatsaih a, chungah chuan thisen unit 22,602 pek a ni.

AVBD chuan sorkar lama hotute leh Mizoram mipuite nen an tanrualna avangin voluntary blood donation-a target an siam an khum thei hi lawmawm an tih thu sawiin, target khum a nih theih chhan, blood centre hrang hrangte, thisen petute zawng zawng leh Mizoram mipui chungah lawmthu an sawi.

AVBD chuan Good Friday lo thleng tur puala thisen pe turin Mizoram thalaite an ngen.

Mizorama thisen mamawhna a san zual zel avangin, thisen pek hi tawpsan mai theih a ni lo va. Thisen mamawh damlote’n a hun takah thisen an dawn theih nan leh nunna chhanna atan thisen pek uar zel turin mipui an sawm a. Thisen pek lamah hma sawn zel theih nan tura AVBD chuan an hmalakna ah te tawiawm a, thlawp zel turin an ngen bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427