Aizawl FC chuan Inrinni zan khan I-League kal meka an khelh hnuhnung berah Namdhari FC chu 3-0-a hnehin tlak hlauhawm karah an him.
RG Stadium, Mualpuiah mi 8,000 velin Aizawl FC hi an tawiawm a. Lalrinzuala’n goal hniha khung a, Namdhari FC defender Moro Lamine chuan box chhung mual vei lam sir a tanga Rinzuala vawrh chu an lamah a dang lut bawk a ni.
Namdhari FC hian point 29 neiin table-ah parukna an ni mek a, tla thei an ni tawh lo va. Aizawl erawh point 20 neiin 10-na an ni thung a. Hnehna an chan loh chuan I-League atanga tla thei dinhmunah an din avangin hnehna chan ngei tumin an bei a, phu takin hnehna an chang zui ta a ni.
Goal hmasa ber hi inkhelh tan a tanga minute 13-ah Biakdika ball pek chu Rinzuala’n box-ah lalutin chiang zetin an goal hmahruai a thun.
First half tawp dawn minute nga a la awmah vei lam sir atanga Rinzuala pet chu Namdhari defender Lamine chuan an lamah a dang lut a. Aizawl chuan 2-0 a hmahruaiin hun chanve an hmang zo.
Second half tan atanga minute 10 a ral hmain ding lam sir atanga Bda ball pek chu Rinzuala chuan goal-ah chantirin an goal thumna a khung a, Namdhari hian an siphur hi sut tumin nawr let thin mah se huntawp thlengin goal an khung lo.