Mizoram Badminton Association (MBA) chuan 2024-25 Player of the Season atan Mizoram mai ni lo, India ram leh khawvel huap inelnaa Mizo tihmingthatu pahnih, C.Lalramsanga leh Lalrempuii te an thlang.
Season hman zawh taka Mizoram badminton player che thate chawimawina hun hi Inrinni tlai khan Mizoram Badminton Centre, Zuangtui, Aizawla Yonex-Sunrise Pooya’s Locker MBA Inter Club Badminton Championship 2025 khar rualin hman a ni.
Mipa player che tha bera thlan, Durtlang tlangval, Ramsanga hian a phu hle a, khawvel huap atanga Mizoram chhung inelna thlengin medal hrang hrang 13 zet a vaw chhuak.
Khawvel huap inelnaah bronze medal panga a la a, India ram pum huap junior championship-ah Mizo zinga champion thei hmasa ber a ni bawk.
India huapa inelnaah gold leh bronze pahnih ve ve a vaw chhuak a. Mizoram rawlthar rual, U-19 Boy’s team chu North East Zone Inter-State Championship-ah a a hovin an champion.
India hmarchhak huapin gold leh siver pakhat ve ve a la a, Mizoram chhung inelnaah gold leh silver pakhat ve ve a la bawk a ni.
Serchhip tleirawl, hmeichhe Player of the Season Rempuii pawhin a chawimawina dawn hi a phu hle a. Junior national championship-ah a champion a, India ram pum huap inelnaah bronze medal pakhat a la bawk.
NE Zone Inter-State Championship-ah Mizoram Junior Girl’s team chu final a luhpui a, champion-pui thei ta lo mah se a Mizo tleirawlten an vawi khat final luhna a ni a. Mizoram chhunga inelna sang berah silver a dawng bawk.
Chawimawina ngaihhlut hlawh dang, Most Promising Player (Mipa) chu Malsawmhlua, Serchhip hnenah hlan niin hmeichhiaah H. Lalrinhlui, Chanmari West thlan a ni bawk.
- Club thiam ber SBC
Yonex-Sunrise Pooya’s Locker MBA Inter Club Badminton Championship 2025-ah Saron Veng Badminton Club (SBC) chu che tha berin overall champion an ni.
Inter Club Badminton Championship hi team inelna a kalpui a ni a, category pakuaah inel niin district badminton association pariat atangin team 54 an inlan.
SBC hi 55+ Men’s team leh U-15 Girl’s team-ah an champion a, U-19 Girl’s team-ah silver medal dawngin a pum puia team che tha ber an ni.
Chanmari Shuttlers Club, Chaltlang Badminton Club leh Mizoram Police Badminton Club-te chuan gold pahnih theuh an la a, Ralte Villa Badminton Club leh New Serchhip Badminton Club-te chuan silver medal pathum ve ve an dawng bawk.