Ran lakluh chungchangah hian dan fel fai tak a awm a. Mahse heng dante hi hman a ni ngai lo em ni aw a tih theih. Kan ramah vawk a pul chiam a. A thuphungin ramdang atanga vawk lakluh phal loh thu DC ten an han puang a. Mahse, kan hlauh ber natna chu a lo lut tho tho mai. Dan bawhchhiat avanga na taka hrem an awm lem lova. DC ten lakluh phal loh thu an puan lai mekin a thenin lakluh phalna an lo pe leh thin thul! A buaithlak thin hle.
Ran lakluh chungchangah hian fimkhur a ngai em em a ni tih hre reng chung hian kan chesual leh thin. Khawvel ram tin hi an fimkhur em em a. Ran an lakluh dawnin a him em? Eng natna nge an lakluh tur vulhna hmunah khan leng? An lakluh tur chu a hriselna a tha em tih an enfiah vek a. Chumi mai chu duh tawk lovin an rama an lakluh hunah an boruak kha ran tan khan a tha ang em tihte hi an zirchiang hmasa thin. Keini ramah pawh ran natna hri leng thin hi kan vawikhat chetsualna niin a lang lo. Tunhma khan vawk natna dam hleithei lo PRRS chu ramdang atanga kan vawk lakluh atanga kai ngei nia hriat a darh chiam tawh a. Vawk vulhtuten namen lovin an tuar anih kha. Tunah ASF in min la chenchilh reng bawk.
Ran natna laka heti khawpa kan tawrh zin hnua ran him lo laluta kan han tuar nawn sak sak thin hi chu kan ram hruaitute leh a enkawltu department pawh hian in enlet nan hmang ngei teh se. Ran hri leng reng mai hi vei a hun tawh hle.