Aizawl: Sports Minister Lalnghinglova Hmar chu South Asian Football Federation inkhawmpui, SAFF Extraordinary Congress, Sri Lanka khawpui Colombo-a Shangrila Hotel-a Zirtawpnia neihah India aiawhin a tel.
He inkhawmpuiah hian Asia Chhim-Chhak ram pasarih – Bangladesh, Bhutan, India, Maldives, Nepal, Pakistan leh Sri Lanka aiawh palaite an tel a, Mizoram Football Association President ni bawk, Lalnghinglova Hmar hian India ai a awh a ni.
He inkhawmpui hi Asian Football Confederation President Shaikh Salman bin Ebrahim Al Khalifa chuan hmanpui a. SAFF inkhawmpui hian an pawl danpui thenkhat an tihdanglam bakah SAFF hnuaia inelna kalpui dan turte an rel a ni.
Lalnghinglova Hmar hi All India Football Federation (AIFF) Executive Committee Member a nih bakah Asian Football Confederation hnuaiah Social Responsibility Committee-ah member a ni mek.
Inkhawmpui zawh hnu hian Sports Minister hian AFC President chu kawmin, India ram, a bikin hmar chhakin football lama hma a sawn theihna tura rawtna a neihte a hrilh a; Indian football hre chiang turin India a tlawh leh hunah football tuichilhna hmar chhak state tlawh tel turin a sawm.