Aizawl: Lengpui Airport chungchanga Union Home Minister Amit Shah tawngkam chak taka um zui turin Lengpui Airport Forum chuan sorkar an ngen.
Lengpui Airport chungchang a hmalatu Lengpui Airport Forum chuan Inrinni khan tun hnaia Union Home Minister Amit Shah-a’n Airports Authority of India (AAI) kuta Lengpui Airport dah a nih tur thu a sawi chungchang leh thil kal zel dan thlirhoin an thukhawm a. He hunah hian an duh ang ngei a, AAI-in Lengpui Airport an la tur anga thil a lo awm ta hi lawmawm an tih thu an sawi.
Hemi chungchanga Airport Forum-in hma an lo lak tawhna leh NGO Coordination committee-in theihtawp chhuaha hma an lo lak tawhna lo thlawptu zirlai pawl, pawl hrang hrangte leh Mizo mipui chungah thinlung takin lawmthu an sawi.
Lengpui Airport Forum chuan Lengpui Airport chungchanga home minister tawngkam hi chak taka um zui turin chuan sorkar an ngen a, state tana tha tur leh an duh dante pawh sorkar laipuia thlenna remchangah la turin a ngen a. Lengpui Airport Forum pawhin hemi chungchangah hian union home minister leh chief minister-te hmala zui tura ngenna a thawn dawn niin an sawi bawk.