Union Ministry of Home Affairs (MHA) chuan tangka kum liam ta, 2024-25 chhungin May 3, 2023 atanga chi leh chi inkara buaina chhuak avanga Manipur-a baihvaia awm mekte puihna Rs vaibelchhe 217 pek a ni tih Pathianni khan thuneituten an sawi.
Thla 23 liam taa chi leh chi inkara tharum thawhna a chhuah hnuah mi 50,000 chuang chu district hrang hranga relief camp 250 velah tun thlengin an la awm mek.
Relief camp-a awmte tan hian district hrang hrangah an awmna tur in dinsak leh mek an ni bawk.
Manipur Finance Department-a hotu liante chuan tangka kum liam ta khan sorkar laipui atangin kawng hrang hranga hman tur sum an dawng tih an sawi.
March, 2025 khan Centrally Sponsored Schemes (CSS), Scheme for Special Assistance to States for Capital Investment (SASCI) leh central scheme dang hmangin Rs vaibelchhe 1,926 pek an ni a. Hei hi thla khat chhunga puihna sum an dawn tan ber tum a ni tih a sawi.
Union Finance Minister Nirmala Sitharaman-i chuan tun hnai khan Manipur hi SASCI hmanga puih an ni dawn tih a sawi a. Kum liam taah SASCI kaltlangin Rs vaibelchhe 1,437 a dawng a, kum khat chhunga dawng tam ber an ni a. Heng zinga 60% dawn, Rs vaibelchhe 869 chu March thla bika an dawn a ni a. SASCI hmanga puihnaah hian PWD hnuaia hna kal mek thawh zawhna tur Rs vaibelchhe 320 a tel bawk.
Thuneitu hian 2024-25 chhung khan PMAY-Grameen hnuaia Rural Housing-ah Rs vaibelchhe 169 an dawng tih a sawi a. School education-ah Rs vaibelchhe 520 , health-ah Rs vaibelchhe 305 leh Ministry of Women & Child Development atangin Rs vaibelchhe 458 an dawng bawk.
A vawi khat nan National Health Mission hnuaiah thawh li bak sum inpek a awm theih rih loh laiin a bik takin thawh dang atan sum an dawng bawk.
February 13 atanga President’s Rule-a awm mek, Manipur tana March 10-a union finance minister-in Lok Sabha-a budget a pharhah sum hman tur Rs vaibelchhe 35,104 ruahman niin a hma kuma Rs vaibelchhe 32,657 aiin a pung hle.