North Korea chuan kum ruk hnua a vawi khat nan Pyongyang International Marathon a huaihawt leh ta a, an khawpui kawtthlera intlansiak zingah hian ram dang mi 200 vel an tel.
Marathon hi kum 1981 atanga an huaihawt tan niin April thla apiangin an ram dintu, Kim Il Sung-a piancham puala neih thin a ni.
Pathiannia an intlansiak hmaa a hnuhnung ber chu kum 2019 kha a ni a, ram dang mi 950 an tel a. North Korea hian a hnu kumah erawh Covid-19 hripui avangin a inkharkhip ta tlat a ni.
North Korea hi a inhawng har hle a, tunah pawh zawi zawiin a inhawng a, nikum atang khan an khawpuiah hian Russian chauh luh an la phal a ni.
Hripui a len hma pawh khan intlansiaka telte hi tour group ang chauhva an luh an phalsak thin.
Beijing-a travel agency pakhat, Koryo Tours chu ‘exclusive partner’ an ni a, intlansiaka tel turin ni ruk chhung châm nan Euro 2,195 ($2,406) a ngai a, hei hian Beijing atanga thlawh luh leh haw leh lam a tum tel.
“Pyongyang Marathon hi thil danglam bik a ni a, tual chhung mite nena inpawhna remchang tak a ni,” tiin agency hian an website-ah an tar lang.
Pathiannia an intlansiak hian an khawpuia hmun chhinchhiahtlak tak tak – Kim Il Sung stadium, Kim Il Sung-a’n Japanese roreltute a um let avanga din Arch of Triumph, scientist leh engineer chenna Mirae Future Scientists’ Street te pawh an tlan tlang.
Online-a thlalak thehdarhah chuan intlansiakte tlan tanna leh an tawpna khelmualah entu an khat vek a, kut beng leh rangkachak rawng lehkhaa siam flag an vai suau suau pawh a lang.
Intlansiak result erawh vantlang hriata puan a awm lo thung.
North Korea hi kum 2023 laihawl vel atang khan Covid-19 avanga an inkhuahkhirhna an hlip tan ve chauh va. February atang khan khawthlang ram khualzinte chu khawchhak kila Rason an tlawh phalsak an ni chauh a ni.