- Reuben Lalnunthara Hnamte
Khawvel hi lemchanna hmun a ni ringawt a, thil tak tak(realilty) hi chu awm teuh mahsela, kan hmuh leh hriat tam ber hi chu lemchanna a ni. Hollywood, Bollywood-a film changtute’n film hmuhnawm tak tak, a tak ni miah lo an han chang a, hmuhnawm ti takin kan lo en a, a changtute kan ngaisangin khawvelah pawha mi lar leh hausa ber berah an inhlangkai hial a nih hi. Chung an hauhsakna leh an larnate chu lemchanna avang a ni a; an film channa misual ber ber nia kan hmuh te hi a takah chuan mi fel tak tak an ni a. A changtupa chak leh thei tak takte hi a takah chuan eng ual an ni bik lo. Mi tam takin kan atchilh a, a taka lo tih ve tum thih phah ta leh chhiat phah ta te pawh sawi tur an awm nual tawh a ni. Vai film-ah phei hi chuan a changtupa leh changtunute hi an an chak(hero) thei khawp a, a taka mihring tihtheih piah lam a ni thin. Chu chuan khawvel a tuam a, khawvel ngaihsan leh atchilh an ni hial hlawm a nih hi. Lemchanna hian khawel hi a tuam a ni ber a, ram lian leh tiltithei deuh hote an hanin ngur deuh chhur chhur a, an indo dawn emaw tih tur khawpin. Mahse, thil dang engemawah chuan an inthurualin an inkawmngeih leh viau lawi si!
Kan ram hruaitute’n session an han nei a, opposition lamin zawhna khirh tak tak an han zawt a, an inhnial luai luai a. A chang chuan thinrim leh insual duh khawpin an inbei nimaiin mipui chuan kan hmu a. Mahse, a takah chuan house atanga an chhuah hnuah chuan fiamthu nan hmangin an inkawm ngeih tlang em em lawi si a! Mipui tam tak chu min bum chiang hle thin a nih hi. Tunlai khawvel hi lemchanna hian min tibuai takzet a, mi bum tur, pawisa tam tak bumchhuah tur zawngin, social media kaltlang mi thenkhat an in pholang(advertise) a, awihawm takin mi tam tak sum an chhuhsak a, Mizoramah pawh chutianga bum leh sum tam tak hloh kan awm nual tawh a nih hi. Sumdawnna thilah lah inbumna a tam a, internet kaltlangin thil kan chah a, a lema kan hmuh aia chhia leh kan chah nilo deuhte kan dawng ang nawlh nawlh a. Lemchanna hian kanin awm tlei a, lemchhanna khawvelah kan awm a, lemchanna hian kan nunah hian bu a khuar thuk ta tulh tulh mai a ni. Kan kristiannate pawh hi lemchannaah kan siam zovang tih hi a hlauhawm ta hle mai.
Mi tam tak hian thil tak tak hi kan peih tawh lo; a taka nun hi kan hnawl tan tawh. Kohhranah nise, chawlhniah inchei nalh takin angel vuakthlak niawm fahranin kan inkhawm a. Biakinah muk zetin kan awm a, kan Biakin nungchangah chuan thil tisual thei leh rilru chhe pu awm pawhin kan lang lo. Nimahsela, pawnlama kan khawsak dan nen chuan a inthlau viau lawi thin si a. Pathian thutak, atak ram hi mi tam ber chuan kan pawh pha tawh lova, inchei nan leh lan mawi nan chauh kan duh ni ber hian a lang. Tunlai kan zoramah pawh hian hausa thut thut an tam ta hle mai; an sumdawnna hlawk vak tura ngaih si loh hausa viau si kan ngah tawh a. Kohhran an bum a, khawtlang leh mipui min bum a ni ber. Kohhranah leh khawtlangah chuan inpe tak leh taima tak tak an lo ni thin si a. An zarzo tawk leh lamtang tam tak an lo nei tawh thin bawk si a, a buaithlak thin khawp mai. Hmanni lawka damchhung lungin tang tura pawngsual thubuai nei ta – Pastor Bajinder singh ‘Church of Glory and wisdom’ dintu khan mipui a bum ching hle. Punjab-ah kohhran lian tak a din a, mipui lah chuan an ngaisangin an Pathian biak lo chauh a ni ber a; mahse, a phena a nun dan tenawm tak khan a kohhran memberte a barakhaihin a bum chiang hle a ni.
Chutiang chuan lemchanna hian khawvel thilah mai pawh nilovin Pathian thu thlengin thuk takin a inrawlh tawh a, kan sawi seng lovang. A pawimawh ber chu a tak ram (reality) hi kan thiltihna kawng tinreng leh Pathian thuah pawh kan kalpui thar a pawimawh takzet a ni. Tunlaiah youtube kan en nasa hle, zoram mipui za 80 vel hi chuan kan en ngei pawhin a rinawm a. Youtuber ten thil hmuhnawm tak tak a tak niawm a lang, nawm hmel tak leh tih ve chakawm tak tak an rawn pholang a. Sum an hmuh nan mipuite en chak turin videote an rawn siam a. Tute emaw innei, hmuhnawm tak takte kan lo en ve a, an tih ang ngeia tih ve kan chak a, kan neih phulovin kan tih ve ngei kan tum a. Inneih chung changah pawh hian kan ram pui vantlang hian a senso tlem thei ang bera tingam nih hi tum a pawimawh khawp mai. Tunlaiah mi hausa hote tih dan ang kher a tih ve kan tum zel hi chuan mipui vantlang tan harsatna min siam nasa hle. A inneite kha an pawimawh ber, lawm ropui eng ang pawh nise, an inneih rei lova, an kehchhe leh mai a nih si phei chuan awmzia a nei lo. Chuvangin Inneihnate pawh hi a landan mawi leh hautak lamah a innghat lova, a pawimawh ber chu a tak tak(reality) kha a ni zawk.
Incheina chung changahte pawh hian Mizoram mipui hi kan incheina a sang lutuk hi a zahthlak. Changkang anga lang changlang lo tak a ni. Sap ho kan tihte khu, mipui vantlang incheina chu a mawlmang(simple) thei ang ber a ni. Milar (celebrities) ho incheina manto tak tak ang khu lo entawn(copy) tum ve phet pawh hi a tullo khawp mai. Kan Biakinte pawh hi mi rethei tan inkhawm that ngam loh khawpin incheina kan tisang a. Mi hausa nuho leh nula hovin chawlhni tin mai a hak tur kawngthar an nei ziah angte hi lo entawn ve tum lo ila,; mi hausate pawh hian a mawlmang deuha incheite pawh hi zir a pawimawh khawp mai. M.K.Gandhi chuan “Hmeichhe in cheina chu nungchang thianghlim a ni” alo ti daih a sin. Pawnlama lan mawi lam aia a tak tak a chhungril nunze mawi hi kan zir thar a tul hlein ka hria. Lemchanna hi kan kalsana a tak ram nun hi kan uar deuh deuh ava tul em! Khawvel mi hausaber Elon Musk a awh khu tikhawpa hausa ni chung khuan nitina a chen tamna ber In chu India pawisaa nuaih 40 man vel chauh a sin. A lem hmanga hausak ai chuan atak tak nun neia retheih pawh I thlang ngam zawk ang u. Mite hian kan pawnlam incheina aiin a taka kan nun hi sin an hmuh duh a, anmahni hnehtu thin zawk chu.