Manipur-a Churachandpur-ah ui a hri a leng mek nia ngaih theih a ni mek a, thuneitute chuan hmun tam takah inkhuahkhirhna leh containment zone a siam.
Ui a hri hi kar hmasa atang khan hriat tan niin Churachandpur district-a New Zouveng khua chu containment zone-ah puan a ni tawh.
January atang khan ui seh mi 749 an awm tawh a, mi pathum an thi tawh niin thuneitute chuan an sawi.
New Zouveng-ah hian ui a seh eng emaw zat dawn niin thenkhat chu a ni ngei tih pawh finfiah a ni tawh hlawm a, hriselna leh vantlang himna leh ran himna pawh a derthawng thei nia sawi a ni.
District Magistrate Dharun Kumar chuan khua atanga ran vulh/ui luhpui leh chhuahpui a khap a. Khaw chhunga ui leh ran vulh zawng zawngte chu chhinchhiahah invenna pek vek turin a ti bawk.
Khaw thlithlai, in tin vil leh health check-up neih a ni dawn a. Containment chhung hian tual chhung ui hralh leh hmun danga pek chhuah chu khap vek a ni bawk tih a sawi.
Dan leh thupek bawhchhia chu na taka hrem theih an ni bawk tih thuchhuahah tar lan a ni.
Veterinary department chuan New Zouveng-ah hian Quick Response Team a din nghal a, hmun hrang hrang an tlawh tawh a. In 30 chuang thlithlai an nei tawh a ni.
Survey team-te chuan in an tlawh apiangah ui an neihte chu invenna an pe nghal a, certificate an pe tel zel.
District Veterinary Officer Dr Veithienneng chuan invenna damdawi an ngah tawk lo chu thil buaithlak, hri darh zel tur venna atana thil tiharsatu a nih thu a sawi.
Kum tin ui a hri avang hian khawvel pumah mi 60,000 chuang an thi ziah a, heng zinga 36% dawn chu India-a mi a ni tih UNDP (United Nations Development Programme) chuan a sawi.