Aizawl: Rajya Sabha MP K Vanlalvena chuan Sairang thlenga rel lo lut tur chungchang hi Parliament session-ah vawi li lai a thlen tawh tih a sawi.
April 4, 2024-a Rajya Sabha parliament thukhawm neih zawh a nih hnuah nimin khan MP K Vanlalvena chu Mizoramah lo hawin, Lengpui Airport-ah MNF General Headquarters-a Secretary te’n MP K Vanlalvena an chhuan thu, thuziak hrang hrangte an kengin an lo hmuak.
K. Vanlalvena chuan Sairang Railway Station chu a haw kawngah tlawh nghalin, Deputy Chief Engineer Aizawl NF Railway Harjimal Meena-a’n a lo dawngsawngin, inkhawm tawi buatsaih a ni.
He hunah K. Vanlalvena chuan thu sawiin, “Zoram mipuitena kan hriat tawh thin leh kan nghahhlelh em em, helai rail station hi engtikah nge zawh a ni ang tihte kan lo ngaihven em avangin parliament session-ah te pawh ka sawi chhuakin, engtikah nge zawh a ni ang tihte pawh kan lo zawt fo tawh,” a ti a, Parliament session-ah helai railway chungchang hi vawili lai a lo thlen tawh thu a sawi.
K Vanlalvena chuan Bairabi atanga Sairang inkar, km 51 leh tlem hi hna zawh thlenga pawisa senso atana santioned zat chu Rs vbc 8,215 a nih thu a sawi a. Tun thlenga hman zawh tawh zat chu Rs vbc 7,714 ni tawhin, hemi huang chhungah hian zawh ngei a beisei thu a sawi.
Zin veivah nana tlawm ber rail kawng kan nei thei dawn ta chu lawmawm a tih thu sawiin K. Vanlalvena chuan, “Tunah hian helai hi rail kawng tawp ber ni rih mah se, Mizoram dung hruta Zochachhuah thlenga railway siam hi central sorkar thil tum a ni,” a ti.