British cardiologist hriat hlawh tak, John Camm-a hminga doctor anga lemchang chu Uttar Pradesh-a Prayagraj-ah Thawhtanni tlai khan man a ni a, man a nih hma hian Madhya Pradesh-a mi lung a zaisak zinga pasarih an thi nia puh a ni.
Doctor lemchanna nia sawi hi Damoh, Madhya Pradesh-a thleng niin Christian missionary hospital-ah a ni a. A hming tak Narendra Vikramaditya Yadav-a hi nihna lem leh dik lo hmangin a thawk a ni.
Damoh Superintendent of Police, Shrut Kirti Somavanshi chuan news agency ANI hnenah, “Rinhlelh doctor, Narendra John Camm-a hi kan team-in Prayagraj-ah man a ni a, Damoh-ah lak a ni,” a ti.
Police chuan Yadav-a lakah mi bum leh thil lem siam avangin FIR an ziak lut a, fimkhur lo taka thil tih avangin thubuai dang ziah luh a ni bawk a. Mi a tihlum nia puhna hi district collector leh National Human Rights Commission (NHRC)-in a hranin an chhui bawk.
Yadav-a hi Dr John Camm-a ang hian January thla khan Damoh-a Mission Hospital hi a zawm a, thla khat leh a chanve a thawh chhungin mi pasarih an thi niin sawi a ni.
An district-a child welfare committee president, advocate ni bawk, Deepak Tiwari-a chuan Yadav-a hian mi tam tak a zai a, hei vang hian a zai hlum hi tuna an hriat ai hian an tam zawk thei tih a sawi.
Tiwari-a hian damlo chhungte hnen atanga doctor lem tia sawina a dawn hnuah Yadav-a lakah hian tualthat tiin complaint a thehlut a, lehkha pawimawh, a nihna tichiang thei leh fiah theihna engmah a nei lo niin a sawi.
NHRC member Priyank Kanoongo kaihhruai team chuan Thawhtanni khan Damoh hi an thleng a, a chhui hna an thawk tan nghal.
Kanoongo chuan, “Doctor lemin missionary hospital-ah damlo a zai tih complaint kan dawng a. Damdawi in hi Ayushman Bharat scheme hmangtu leh sorkar atanga pawisa pawh dawng an ni a. He thil hi kan ngai thu tak hle a, a chhui hna pawh kan thawk tan nghal mek a ni,” tiin a sawi tih ANI chuan a tar lang.