Chief Minister Lalduhoma’n nimin khan a pisa-ah International Fund for Agricultural Development (IFAD) Design team te a kawm a. Mizorama FOCUS 2.0 kalpui dan tur an ruahmanna te a enpui.
Chief minister hian FOCUS 2.0 atana an thil ruahmanah han belh deuh hlek tula a ngaih thu te, scheme dang nena kalkawptir a that a rin thu te a sawi a. Hmalakna inbawhthuah a awm loh nana department dangte nena inhre tawna kal a pawimawh thu leh thil thar chin chhuah lama hmalak uar a thaa a hriat thu a sawi bawk.
Piyush Kanal, Country Programme Analyst, IFAD & ICO chuan kum 2019 atanga bul tana kum 2024 a tawp ta, FOCUS Mizoram district paruka khaw 272 a cheng chhungkaw 55,000-te tana hma an lakna zarah chhungkaw 41,888 ten sik leh sa inthlak tuar thei eizawnna an thlang zui ta nia an hriat thu a sawi.
Thawhhnihna an kalpui tur FOCUS 2.0 an ruahmanna tlangpui hi Alessandra Cage, Mission Director & Agri Business Expert chuan sawiin, Mizoram district 11 a RD Block 26 huama khaw 700 huapa kalpui an tum dan a sawi a. A Project Component pawimawh tak chu Market Access & Entreprenuership leh tharchhuah tihpun leh, sik leh sa inthlak zel tuar thei chi thlai uar a ni a. Mizoram sorkarin Zau Policy a kalpui tur nena kal tlang thei tura ngaih a ni.
FOCUS 2.0 hi Bana Kaih nena inhne rual taka kalpui theih a nih thu a sawi bawk.