Mizo te hian chhiat tawh thulha lukhawng nei tura pawisa dahkham (insurance) lam hi kan hre ve tan ta viau emaw tih laiin, a tam zawk erawh hi chuan a pawimawhna leh a tangkaina lam hi kan la bengkhawn tawk lo niin a lang. Hemi kawngah hian hnamdang bawk hi tluk an har lehpek.
Kan insurance hriat tlanglawn ber pawh kan vehicle insurance hi a ni mai awm mang e. Chu pawh lirthei neih dawna tih ngei ngei a ngaih avanga insure hram hram chauh kan ni a. Insurance dam hun chhung a tawpa tinung chhunzawm loa ngaihsak zawm ta lo hi a tam zawk an ni mai thei e.
Kan chhehvela hnamdang mistiri te leh mutia kan tihte pawh hi hemi kawngah hian fing var viau lo tura kan ngaih laiin, an hmuh chhuah ang ang hman ral nghal mai lam aia a peipun dan leh, chhiat an tawh thulha lukhawng nei thei tur zawka an sum thawhchhuah lo dah keuh keuh hi an ching hle.
A bik takin Mizote hian neih zawng zawng leh loan te puk belha chenna in sak kan chin viau laiin, chhiat tawh thulha lukhawng nei tura pawisa dahkham lam hian ngaihthah a hlawh fo a. Chenna in sakte hi khuarel chhiatna kan tih he’ng – lirnghing, leimin, kangmei leh chhiatna chi hrang hrangte avanga zan khat thil thua chan thut theih vek a ni tih hriat thar reng a tul a. Sorkar lam atanga chhawmdawlna leh tanpuina tam tak awmte hi innghahna ber atana hman chi pawh a ni hek lo.
Life insurance te, general insurance te, vehicle insurance te, building insurance te, health insurance policy te, bungraw insurance thlengin mimal tan leh chhungkaw tan insurance chi tam tak a awm a. Zan khat thil thua tlu sawp vek thei kan nihzia inhriaa insurance tih kawngah hian tan kan lak thar a tul ta hle. Chhiatna, thihna leh natna kan tawrh hnua kan inchhir lohna turin insurance ngaihven kawngah Mizo mipuite hi kan thanharh a ngai tawh takzet a ni.