Sipai sorkar leh hel pawl intel khawmten lirnghing avanga chhawmdawlna hna thawh a nih theih nan inkahhai puang mah se Myanmar-ah chuan nasa takin indona a la awm reng.
Sipaite hian inkahhai an puan hnuah Zirtawpni thleng khan vawi 14 vel beihna an thlen leh tawh niin UN Human Rights pisain report a dawnah tar lan a ni.
Sipaite hian hel pawl tangruala pawl hnihinbeihna an thlen zawk niin an sawi a. Pawl khat hian sipaite chetna ‘an chhang let’ niin a sawi ve thung.
Military Council thupuangtu, Maj Gen Zaw Min Tun chuan thuchhuah siamin ‘chhan awm lova sipaite hmun beih a nih chuan kan chhang let zel ang’ tih a sawi.
UN High Commissioner for Human Rights Volker Türk chuan March 28-a magnitiude 7.7-a ‘lirnghingin a tihbuaite chu pawl hrang hrangin an tanpui theih nan sipaite beihpui thlakna chu chawlhsan a ni dawn’ niin a sawi.
Kum 2021-a sipai chakna hmanga thuneihna changtu sipaite leh anmahni duh lotute inkarah tual chhung indona a chhuak mek a. Sipaite hi hnam bil sipai leh sipai duh lova bei lettute an ni hlawm.
Hel pawl pathum telna tangrualin inkahhai an puan hnuah military council hian April 2 khan ni 20 chhung an puang ve.
Myanmar lirnghinga thi hi Thawhtanni khan mi 3,564 an ni tawh niin sorkar chuan a sawi a. Mi 5,012-in hliam tuarin mi 210 chin an la hre lo.
Chawlhkar khat chuang a liam hnuah kartawpah khan Mandalay-ah chuan in chim karah ruang hmuh zel a ni tih sorkar chuan a puang.
Kartawpah khan ruah a sur a, hei hian pawl hrang hrangin chhawmdawl hna an thawh a tikhaihlak.
UN humanitarian chief Tom Fletcher chuan Mandalay atangin Inrinni khan video tichhuakin mipuite hian ei tur, tui leh power an mamawh hle a, awmna tur an mamawh tak zet bawk tih an hrilh tih a sawi.
Nghing nawn (aftershock) awm rengin kartawpah khan magnitude 4.9-a nain a che a, mite chu ‘hlau takin’ an la awm reng niin a sawi.
Lir a nghin hma pawh khan mi maktaduai 20 chu puih ngai tak an ni sa tih Fletcher-a chuan a sawi a. “Buaina karah lir a lo nghing zui leh a, puih an mamawhna chu a sang hle a ni,” a ti.