Aizawl: MPCC Sr Vice President Lalnunmawia Chuaungo chuan universal health care chu a chhawrtu tura an duh mi rethei zawkten an chhawr theih loh a hlauhawm tih a sawi.
Nimina Kolasib Block I leh Serlui South Block chhunga khaw hrang hrang a tlawh kualnaah thu sawiin Lalnunmawia Chuaungo chuan, ZPM-in universal health care chu tihhlawhtlin tumin theihtawp chhuah mah se, a famkim lohna lai atam avangin damdawi in tam zawkin an pawm thei lo tih sawiin, “A chhawrtu tura kan duh mi rethei zawkten an chhawr thei lovang tih hi a hlauhawm hle,” tiin, Congress party an sorkar hunah chuan a chhawr tur dik tak mi rethei zawkten an chhawr theihna turin hma an la dawn tih a sawi.
Tun dinhmuna Mizoram education system hi nu leh paten an tu leh fate chher chhuah nan an ring tawk lo a ni tih hairual lohin a lang tih sawiin Lalnunmawia Chuaungo chuan, “Kan tu leh fate mipuitlinga chher chhuak tur leh mahni ke a ding thei, ram leh khawtlang leh chhungkaw tana chhenfakawm ni tura chher chhuak thei turin kan education system hi education reforms hmangin kan siam tha dawn a ni,” a ti.
MPCC Sr. Vice President chuan, sorkarna chang tawh MNF, ZPM leh Congress te chu bukin an awm mek tih sawiin, Congress sorkar laia a thil tih thata lungawi mai lo vin, a hma aia tha zawk a, ram leh mipuite tana rawngbawl hna thawk turin a inbuatsaih mek thu a sawi bawk.