AZL: Chief Minister Lalduhoma chuan sorkar laipui Ministry of Home Affairs-ah Mizo Territorial Army dinsak tura a ngen thu a sawi.
Thawhlehni khan Chief Minister Lalduhoma leh Anurag Garg, IPS, Director General of the Narcotics Control Bureau (NCB) te chu CMO-ah inkawmin Mizoram paltlang ruihhlo tawlhruk hmachhawn dan tur thilte sawi dun.
An inkawmnaah chief minister hian NCB hotupa hnenah an hmalakna tichak thei tur rawtna an neihte chu ziaka pe turin a hrilh a. Khawchhak lam atanga ruihhlo lo lut nasa tireh thei tur hian ramriah infrastructure tha neih belh a tul thu leh thawktu indaih neih a ngaih avangin sorkar laipuiah pawh rawtna te an thlen tih a sawi a. Mizo Territorial Army dinsak turin Ministry of Home Affairs pawh a ngen tih a sawi.
Garg hian Mizoramah Zonal Office puitling awm thei se tha a tih thu a sawi a, thawktu lam neih belh pawh a tul thu a sawi. Thawktu, Mizo tawng thiam an mamawh hle tih Chief Minister hi a hrilh bawk.