Aizawl: Sorkar hnathawk inzawmkhawmna Federation of Mizoram Government Employees and Workers (FMGE&W) chuan nimin khan Vanapa Hall-ah inkhawmpui an hmang. Inkhawmpui chuan Mizoram Universal HealthCare Scheme (MUHCS) chungchangah sorkar hnathawkte huamtir rih lo tura sorkar nawr chhunzawm an rel.
FMGE&W khawmpui rorel chuan MUHCS chungchangah ngun takin an sawi khawm a, affiliated association aiawhte pawhin an pawl ngaihdante an sawi bawk a. FMGE&W General conference chuan Special Assembly thutlukna lo siam tawh chu a nemnghet a, MUHCS hi a system a la felfai tawk loh avangin sorkar hnathawkte hi huam tir rih lo tura sorkar nawr chhunzawm ni se an ti.
FMGE&W General Conference rorel palaite chuan ‘Mizoram sorkar hnuaia hna lakte hi public interest thlirin department-in an mamawh ang zelin rualkhai zawka lak ni rawh se’ tih te, ‘Vacancy Based Roster (VBR) chungchangah relaxation a awm leh theih nan hma lak leh ni rawh se’ tih te, ‘Mizoram sorkarin a hnuaia thawkte tana Guidelines for framing of Service Rules/Recruitment Rules a siam a qualifying service ngai zat hi a pumpui a ennawn ni rawh se’ tih te, ‘Central sorkar hnathawkte DA pun ruala Mizoram sorkar hnathawkte DA a pun ve zel theih nan hmalak zui zel ni rawh se’ tihte an pawm zingah a tel.
Inkhawmpuiah hian FMGE&W hian an hruaitu tur mi 10 an thlangchhuak a, anni hian an post tur an insiamrem leh dawn a ni.