Aizawl: Mizoram Sports & Youth Services Minister Lalnghinglova Hmar chuan nimin khan New Delhi-ah Ministry of Youth Affairs and Sports hotute a kawm a, Mizoram thalaite hmasawnna kaihhnawiha hmalakna kal mek leh hmathlir te a sawipui.
Sports Minister Lalnghinglova Hmar chuan Sujata Chaturvedi, Secretary to Government of India, Department of Sports, SAI Director General ni bawk hmuin Mizorama SAI Training Centre tihchangtlun dan tur a sawipui a; ziaka ruahmanna a thehluhte chu an lo bawhzui tur thu DG, SAI chuan a lo hrilh. April 26, 2025- a ‘Aizawl International Half Marathon’ neih turah SAI hriatpuina leh pawmpuina dil pawh DG, SAI chuan hmalak pui ngei a lo tiam bawk.
Youth Services Minister Lalnghinglova Hmar hian Meeta R. Lochan, Secretary to Government of India, Department of Youth Affairs pawh New Delhi-a a office-ah hmu nghalin, Mizo thalaiten state pawna ‘exposure’ tam zawk an neih theih dan tur a sawi pui a, Mizo thalaite tana tangkai thei Ministry hmalakna kal mek leh hmachhawpte an sawi dun.
Lalnghinglova Hmar chuan kumin kumtawp lamah Mizoram-a thalai intawhkhawm lian huaihawt a duh thu leh, ziaka rawtna a thlen thuai tur thu a hrilh a. Rawtna a awm hunah a lo bawhzuisak thuai tur thu Meena R. Lochan chuan a lo hrilh a ni. Youth Hostel sak chungchang pawh sawi dunin, written proposal nen inkawm leh thuai tum a ni.