UFC chu Facebook innghahna company lian Meta nen an inkawp tan a, thawh dunna thuthlung ziakin khawvel hmun hrang hrangah zau zawkin mixed martial arts huang zauh zel an tum.
Kar kal ta Nilainia thuthlung an ziah hnuah UFC chuan Meta chu kawng hrang hrangin an hmang tangkai chho dawn tih an sawi a. Meta AI, Meta Glasses, Meta Quest, Facebook, Instagram, WhatsApp leh Thread te chu mixed martial arts vawrh lar lehzualna atan an hmang tangkai dawn a. UFC event velah AI Glasses te chu hman uar an tum thu an sawi.
Dana White, UFC President leh CEO chuan, “Meta hi tunlai khawvelah chuan a lar ber a, a chak ber bawk a. Anni hian mixed martial arts chu bung thar min kaipui dawn a, zau zawkin kan vawrh darh thei dawn a ni,” a ti.
White chuan Meta hi an chhawr tangkai tan nghal tih sawiin, fighter ranking an pek dan kalphung pawh a hma aia tha zawk an duang tan der tawh niin a sawi a ni.
Meta hming chu UFC octagon chhunga tar lan a ni thin dawn a, TV vela an pek chhuahnaah pawh a tam thei ang ber tar lan tura ruahman a ni a. Meta social media platform lian Thread ah pawh UFC lampang an ti tel tawh dawn a ni.
Meta CEO Mark Zuckerberg chuan, “He infiamna hi ka ngaina em em a, UFC nen kan thawkho thei tur hi a nghahhlelhawm ka ti hle a, mixed martial arts ngainatute chuan khawvel thar an dai thei dawn a ni,” a ti.