Aizawl: Central YMA chuan ruihhlo thahnem tak man leh a neitua puh, Henry Lalbiakzinga Chhundeng leh a thurualpuite an phu tawk anga dan hmanga hremna an chunga lek an phut.
Nimina thuchhuah an siamah Central YMA chuan, March 15, 2025-a Mizoram Police ten ruihhlo thahnem tak, hawng 440 lai mai leh hemia inhnamhnawiha puh Henry Lalbiakzinga Chhundeng, Dinthar, Aizawl leh a thurualpuite an man chu lawmawm an tih thu leh, Mizoram Police-te thawhrimna an chhuan thu an tar lang.
An thuchhuahah chuan, “Kan thalai tam tak ruihhlo bawiha an tan mek lai leh nunna hial an chan tawh lai a, ruihhlo hmanga sumdawnna kal pui a ni hi kan haw tak zet a. Henry Lalbiakzinga Chhundeng leh a thurualpuite hi an phu tawk anga dan hmanga hremna an chunga lek a nih ngei theih nan Central YMA chuan a thlir zui reng a. Hemi kaihhnawiha Kulikawn Branch YMA leh Ramhlun North Branch YMA-te hmalakna pawh tha kan ti a, kan thlawp tlat a ni,” an ti.
Mizoramah ruihhlo hluar chho zelah, YMA chuan theihtawp chhuahin hma a la zel tih tar langin, Central YMA pawhin Central Anti-Drugs Squad (CADS) din thar lehin, March 15,2025 atangin hma a la tan leh bawk a. Branch, Group leh Sub-Headquarters YMA-te pawh, mahni huamchhungah tha thlah lova theihtawp chhuaha ruihhlo leh a kaihhnawih thil tha lo do zel turin an chah thar bawk.