Aizawl: Zo Re-unification Organisation (ZoRO), General Headquarters chuan tun hnaia Manipur-a Zofate inkara buaina chhuak leh a kaihhnawiha thi an awm hial chu pawi an tih thu an sawi.
An thuchhuahah ZORO chuan Manipur Zofate inkara buaina chhuak avanga hliam tuar eng emaw zat an awm leh hmun him lam pana mahni in leh lo chhuahsan an awm hialte chu pawi an tih thu an tar lang a. Unau inkara buaina hi khawiah mah thleng nawn tawh lo se an duh thu leh Zofa chi tinte hnenah a ngen.
Manipur-ah Meitei ral neiin thih leh dam karah nunphung pangngai pawh zawh thei loin an awm mek a, tanrual hun tak a nih laia mahni leh mahni an lo intibuai hian an tan rah tha engmah a thlen dawn loh bakah, channa nasa tak leh hmelmate tan lawmna tur a nih bakah, Meitei awpbeha an awmna ni khua a tisei ting mai dawn avangin Zofa, chi tin te inzahtawn leh inngaichang tawn tur leh, hnam kara buaina tichhuak thei thilah chuan tupawh fimkhur tur leh boruak tipunlun zawnga thil ti lo a, inhriatthiamna sang tak nen thu inbahsual palh chang a awm pawh a, a khirh zawng ni lo, a dam zawnga chin fel dan zawng thin turin a ngen.