Social Welfare Minister Lalrinpuii chuan Mizoram district zawng zawngah kum upate tan Old Age Home siam thuai a nih tur thu a sawi.
Ningania Regional Resource Training Centre (RRTC) for Senior Citizens-in Bawngkawn South YMA Hall-ah kum upate tan ‘District Level Workshop on Elderly Issues’ tih thupui hmangin inkhawm buatsaihah khuallian niin Social Welfare Minister Lalrinpuii’n a hmanpui.
Thusawiin Lalrinpuii chuan, “Kum upate hi kan rohlute in ni a, in thiamna leh in tawnhriat hlu tak takte hi thangtharte hian ngaihhlut nachang kan hre tan tawh viau a, kan la hriat belh telh telh dawn. Mizoram sorkar pawhin kum upa zawkte hi a theihna chinah a ngaihsak a, pension pawh kan tipung a. An tana tih theih chinah chuan tanpui zel pawh kan inhuam a ni,” tiin, district zawng zawngah Old Age Home siam thuai a nih tur thu a sawi.
April 8, 2025-a Dehradun-a sorkar laipui, Ministry of Social Justice & Empowerment buatsaih ‘Chintan Shivir’ – 2 Day National Review Conference-ah rualbanlote tan bik school mamawh a nih thu leh kum upate tana Day care cum recreation centre mamawh thute a thlen thu a sawi.
He hunah hian K Lalbiakzuala, Fitness Trainer chuan upate tana insawizawi pawimawhnate a sawi a. Lalremruati, Asst. Professor, Aizawl Law College-in upate chanvo leh dikna venhimna dan, Maintenance & Welfare of Parents & Senior Citizens Act, 2007 (MWPSC Act, 2007) chungchang zirtirna a pe a. ‘Cyber Crime & Fraud’ tih thupui hmangin John Vanlalruata Sailo, Sub Inspector, Cyber Crime-in social media leh technology hmanga inbumna awm theite laka inven dan kalkhawmte zirtirna a pe bawk.