Liverpool chuan an player pawimawh ber zinga mi, forward Mohamed Salah chu contract thar ziahpui tuma dawrin an inbe fel hnai mek.
Inbiakna hi a la kal mek zel rih a, inremna tak tak a la awm lo va; mahse, club hian chanchin lawmawm lam an nei ngei ni chuan a sawi a, inremna pawh an tihfel thuai an beisei.
Salah-a contract neih mek hi tun season tawp ruala tawp mai tawh tur niin a hma lam hun tur a chiang lo hle a. Mi thenkhat chuan Saudi Arabia atangin Egypt international hian dawrtu a nei nia sawi a ni.
Hetiang a nih mek lai hian Anfield chuan beiseina sang tak neiin Salah hi Premier League club-ah hian a la awm zui an beisei hle.
Salah hi kum 2017 nipui laia an lak luh hnuah Liverpool tana mi pawimawh ber pakhat la ni zelin tun season-ah phei chuan champion tuma an beihna kawnga tha thawh hlawk ber a tih ngam a, inelna hrang hrangah goal 32 a thun tawh.
Season riat a awm tawh chhungin Salah hi Liverpool legend zingah a inchher chhuak hman tawh a, kum 2019 khan Champions League final-ah goal thunin nomawi a lakpui a. A dawt leh chiah kumah kum 30 an lo nghah tawh league nomawi a lakpui leh bawk.
Tun season-ah a khelh tawha season tha ber a hmang chung leh Anfield-a la awm a duh thu a sawi thawi chungin Egyptian hian a contract tawp lam a hmang thleng a, inremna thar an la nei lo.
September thlaa 3-0-a Manchester United an hneh hnu lawkah phei kha chuan Sky Sports hnenah ‘a kum tawp tur’ a nih thu leh contract thar lam sawi rik a la nih loh thu a sawi a ni.
November thlaah khan Liverpool-a awm zui ai chuan chhuah lam a lian zawk tih a sawi leh bawk.
Hetiang a nih hnuah Anfield club tantute tan tunah thu lawmawm a lo ri chhuak leh ta a ni.
Kar tir lamah khanah khan Salah ang bawka tun season tawp ruala contract hmang zo ve tur tho, captain Virgil van Dijk pawh ziah belh leh tura indawrnaah thu lawmawm lam a awm tih sawi a awm.
“Thil a kal mek a, a tha lam a ni,” tiin defender hian a sawi.
“Chhung lama thil sawi a ni a, kan la hre thuai ang. Club hi ka hmangaih a, fan-te pawh ka hmangaih a ni,” tiin Fulham nena an inkhelh hma lawk khan a sawi.
Hetih lai hian Trent Alexander-Arnold-a hma hun a la chiang lo zel rih a. Right-back hi season thar intan hmain Real Madrid lam pan turin an indawr fel dawn nia sawi a awm a, ani pawh contract hmang zo tur a nih avangin man awm lova chhuak thei tur a ni ang.