Ruahtui a tla chho leh tan a, tui vanga kan harsatna thenkhat a kiam tan hret hret pawhin a rinawm. Chutihrual erawh chuan kan lui tuite hi kan duat erawh a ngai hle.
Ruah bawhawk a awm apiangin kan tuiluankawr hmun hrang hrangah bawlhhlawh a inhnawhtamin, kawngpuiah a luang chhuak dul dul fo mai a. Hengte hi kan luitui tlana luang lut an nih tih kan hriat reng a tul hle.
Mahni tui tlan pawh thianghlimna kawnga harhtharpui thei lo kan nih chuan kan hmabak chu a thim hle tihna a ni a, a ruka leivung lo paih duh tawk an la awm fote hi inenfiah kan ngai hle mai.
Bawlhhlawh paihna tha tak kan nei a, veng tinin faina kawnga hma kan sawn a, bawlhhlawh paih hunbi mumal tak kan neih tawh lai hian, hmasawn zawnga ke la pen duh miah lo, midangte harsatna siam zawnga che kan la awm fo thin hi chu vantlang hriata veng tinin kan auchhuah maite hi a la tul awm e.
Pawn lama changkang viau si hi mahni tui tlan tibawlhhlawhtu kan ni thei tih hrerengin, faina kawngah leh kan lui tui tihthianghlim kawngah hian mitinin tan i la thar sauh sauh ang u.