Aizawl: ZPM Gen hqrs chuan Supply Minister B Lalchhanzova leh sorkar official-te hmalaknaa buhfai bothlau tur venna kal zelah godown-a thawkte leh retailer-ten buhfai buk dik taka an pek chhuah tak avangin March, 2025 khan sorkarin buhfai quintal 7,566.61 a hum thei a, a pawisa chuan a hlutna hi Rs vbc 2.2 chuang zet a nih thu an sawi.
Nimina an thuchhuahah thla khata buhfai mipui khul tur hi quintal 97,439.63 mamawh thin a ni a, March, 2025-a buhfai hum quintal 7,566.61 a awm theih avang hian April, 2025 quota ngaihtuah belh ngai chu quintal 89,873.02-ah a tlahniam thei ta hi ram siam thatna kawnga hmasawnna ropui takah an ngaih thu sawiin, a changtu minister, B.Lalchhanzova leh sorkar official te thawhrimna an chhuan thu an tar lang.
ZPM chuan thla tin buhfai quintal 7,576 kal ral tur sorkarin a hum zel theih chuan kum khatah buhfai quintal 90,000 chuang a tling thei dawn a, a sum anga chhut chuan Rs vbc 30 vel zet kum khat chhungin sorkar pawisa kalral tur a veng dawn a ni, hei hian a man to a buhfai lei thin kha a titlahniam dawn a, state pawna buhfai leina atana sorkar sum hman pawh a tlakhniam phah dawn bakah, NFSA hnuaia card eng leh card pawlah mi nuai khat zet thun theih an ni dawn a ni. Hetiang taka sorkarin mipui tana ngaihtuahna a sen avang hian godown lama thawktute leh retailerte pawhin buk dik taka buhfai pe chhuak chhunzawm zel turin ngen bawk.