Aizawl: MNF Vice President Lalchhandama Ralte chuan MNF political goal dik tak a la danglam ngai lo niin a sawi.
Ningani khan Ex-Mizo National Army Assocation-in Archives Hall-a General Assembly Vawi 13-na an neih chu Leader of Opposition ni bawk, Lalchhandama Ralte, MLA, chuan khuallian niin a hmanpui.
He hunah thu sawiin MNF political goal dik tak chu Zofate tana zalenna famkim neih a nih thu sawiin, “Hei hi Pu Laldenga hova MNF dintirh a nih ata a la danglam ngai lo. MNF chuan zalenna famkim hi kan la neih ngei kan ring a, kan beisei tlat bawk a ni. Chuvangin, Ex. MNA-te hi MNF neitu, khawvel hriata Zofate min pho chhuaktute an ni a. Kan hnam ro hlute in ni a, mual an liam zel avangin inrem leh lungrual takin awm zel ang u,” a ti.
Lalchhandama Ralte chuan ngaihdan inan lohna leh eng emaw avangin hnam pasalthate chu political platform leh pawl dangah te an awm hrang mek tih sawiin, “Ram leh hnam tana thi, thi ngam an ni a. Chuvangin, hnam pasaltha zawng zawngte in pianna MNF-ah lo kir leh vek turin ka sawmin ka ngen a che u,” tiin, mi thenkhatin zalenna sualtute leh hotute sawinep zawng leh chirhtheh zawnga thu peh hla an nei thin chu pawi a tih thu a sawi.
“British laka zalenna sualtute kha ziaktu thenkhatten ‘Sepoy Mutiny’ tia an sawi thin chu tun hnuah a dik lohzia hriain zalenna sualtu pasaltha tia koh an ni leh ta zawk a. Chuvangin, hnam pasalthate kha he hnam leh ram tan hian an hlu takzet a ni,” a ti bawk.
He hun hi C. Zama, President, Ex. MNA Gen. Hqrs in a kaihruai a ni. He hunah hian martar te sunna hun leh 2025 Local Council tling tharte chawimawina hun hman a ni a. Resolution pali lungrual taka pass a ni bawk.