Mumbai khawpui beihna, 26/11 terror attacks tia sawi mai thin ruahmantua puh, India-in a man duh em em, Tahawwur Hussain Rana chu US atanga phur chhuakin India-a a chungthu rel a ni dawn.
A phurtu atana a hrana thlawhna duah hmanga phurh niin Ningani tlaiah khan India luhpui hman tura ngaih a ni a, he chanchin ziah lai hian an la thleng lo.
Kum 64 mi, Rana-a hi Delhi-a tumpui tur niin National Investigation Agency (NIA)-in an lo man nghal dawn a. NIA leh Research & Analysis Wing (RAW)-ten India-ah hian an hruai haw a ni.
Delhi court-ah a inlan rin a ni a. Pawi a khawihna bera puh, Mumbai police chuan an khawpuia lak turin dilna an la thlen chiah lo thung.
Rana-a hi dan pela mi phiar, India sorkar laka indona kalpuitu, tualthah leh lehkha lem siam hmang thubuaite bakah Unlawful Activities (Prevention) Act hmanga thubuai siamsak a ni.
Canadian khua leh tui, Pakistani hi Chicago-a inbengbel niin mi 166 thihna, kum 2008-a Mumbai khawpui beihnaah a mawhphurtu bera ngaih a ni.
Mumbai beihnaa a mawhphurtu bera ngaih dan, Pakistani-American firfiak, David Coleman Headley-a chuan Rana-a hi kal dan tur engkim ruahmanna siamtu leh sum leh pai ngaihtuahtu ber a nih thu a lo sawi tawh a. Headley-a hi chet an thawh hma khan Rana-a hnuaia immigration consultancy-a thawk angin Mumbai khawpuiah hian a tei hawi kual nasa hle a ni.
Federal Bureau of Investigation (FBI) chuan Rana hi Mumbai beih hnu kum khat, October 2009-ah Chicago-ah an man a. Heta an man chhan ber hi Danish khawpui, Copenhagen-a chanchinbu hmunpui beih tum tlawlh taa a inrawlhna avang leh Mumbai beihnaa bultumtu, Pakistan-a firfiak pawl, Lashkar-e-Taiba tana sum a tuak nasat vang a ni.
Kum 2011 khan Rana-a hi US-ah a thiltih avang hian thiam loh chantir niin Los Angeles-a metropolitan detention centre-ah dah a ni.
February thlaa Prime Minister Narendra Modi nen White House-a thuthar lakhawmtute an kawmnaah US President Donald Trump-a chuan a sorkar chuan ‘mi sual tak’ Rana thawn chhuahna tur chu an pawm tawh tih a puang.
“Kan sorkar chuan pawi khawihna ruahmanntu leh khawvela mi sual ber pakhat, kum 2008-a mi firfiakten Mumbai an beihnaa ruahmantu chu India-a rorelna hmachhawn tura thawn chhuah turin kan pawm a. India-ah kirin rorelna a hmachhawn ang,” a ti.
Ni thum chhung India-a sumdawnna hmunpui beihnaah hian khualbuk, rel station leh Jewish center beih a ni a. India chuan Lashkar-e-Taiba ruahmanna a nih thu a sawi a, Pakistan-a sorkar erawh chuan an inrawlh lo tih a sawi.