- Isaak Roluahpuia; JF Cottage, Shillong
Thil tihnaa tlài hi ka duh ngai lo va, a theih hram chuan tlái loh ka tum thìn. Zíng dár 8:30 atanga tlai dár 4:00 te class kan nei thìn a. Kan awmna atanga college hi km 1 chuanga hlá a ni a, kè-a ka kal thin avàngin 8:20-a college thleng hman tùrin ka kal thìn.
Tukin ka college kái pawh kan class-ah ka thleng hmasa ber a. Tukverhte ka hawng a. Thil ho tak angin lang mah se hnam dang chuan an ti mang ngai miah lo a nia! Sawi loh chuan hmuin hre ve reng mah se hetiang hi an ti mai mai ngai lo. Classroom a lo lum êm êm tâ a, an hre vè vek; mahse, tukverh hawngtu nih an duh ngai lo. Pindan a lo thim êm êm a, eng chhit a ngái tih hre reng mah se a titu-a tan an tum ngái lo. thutthlèng rem that a ngái tih hre reng mah se a rem thatu an ni ngai lo tih theih a ni.
Kawngpuiah mi lo insu sé, puih an tum ngai lo, an en liam tawp thei. Damdawi ina hruai ngái pawh nise, an tlàn pèl mai thìn. Mizo tlangvál chuan chutiang chuan kan en liam vè thei lo. A rang a rangin damdawi in kan panpui thìn. Kan hmélhriat a ni em, kan chhung leh khat a ni em tih lam kan ngaihtuah ngai lo, kan mihringpui a nia, kan pui mai a ni.
Mitthi an awm pawhin damdàwi in bula mi pawh nise thawm dìm takin zan khuain kan meng thìn, Mizo kan ni tlat. A ram mite hauh leh hmuhsit kan tâwk fo a; mahse, kan cho vè rengte pawh ‘Ka cho lo che’ kan ti thìn, a tlàwm hunah kan tláwm mai thìn, kan ram a ni lo tlat a!
Kan hostel pindanah thil siam that leh thawm that ngái a awmin hnam dang chuan warden-te an pun thìn, keini chuan tuboh leh perek kan là a, kan thiam ang angin kan thawm tha thìn. Tui kan tlâkchhamin hnam dang chu an inbual lo mai a, keini chuan tuikhura mi kan zuk cháwi thìn. Zan láia pumna an awmin hospital kan panpui a, tlaivàr a ngaih paw’n kan tlaivár mai thìn. Zan láiah kan pum a nat vè chuan mi hriat hlauvin kan tuar a, an lo hriata “I na emt” min tih pawhin, “Na lo ve” kan ti thìn.
Dáwra kal an awmin “Chû chu min lo lei vè teh, nakinah pawisa ka pe ang che,m” kan ti mai a. Hnam dang chuan pawisa kan pêk hmasa zet loh chuan ei tùr min leisak duh ngai lo. Mizote chuan kan hnam tawng thiam eih eih tawh phawt chu kan ring ngam a, unau ang maiin kan en thìn.
Mizo nih hi a nawmna tam tak a awm, khawi emaw láia mi awm tha duh lohte avàngin kan hmingchhe thìn.