Manchester United manager Ruben Amorim-a’n goalkeeper a nei fuh hleithei lo zel a, Old Trafford club a enkawl tawh china inkhel pawimawh ber tling tur, Nilaini zana Lyon an hmachhawn turah pawh a keeper pahnih neih zingah tunge a hman dawn sawi lawk thiam a har mek.
Lyon an tum hmasaka che fuh loh Andre Onana awltirin Pathianni zana Newcastle an tlawhah Portuguese hian Altay Bayindir a khelhtir a; mahse, St James’ Park-ah thil a danglam chuang lo va, goal li an chhuah a, pakhat phei chu keeper tihsual leh bawk a ni tho.
An goal chhuah hnuhnung berah Turkey international hi a mawhphurtu a ni.
“Tihsual tam tak kan nei khan inkhela chak kha a tiharsa em em a, chu zawng chu a ni mai,” tiin Amorim-a chuan inkhelh zawhah a sawi a. “Thil lian lo tam tak tak a ni a, khawi ber kha nge sawi pawh a har,” a ti.
Europa League quarter-final khelh hnihnaah Lyon an mikhual dawn a, Amorim-a tan he inkhel hi a pawimawh a, season leha an dinhmun hriltu tur thleng a nih avangin Onana a ko kir dawn nge Bayindir-a a ring leh dawn sawi a har.
Onana kha Newcastle lakah khan chawlh hahdamtir a ni nge paih tih hriat a ni lo va, bench-a thu zingah pawh a tel lo thung.
An inkhelh hma khan Manchester United captain hlui, Roy Keane-a chuan Cameroon international laka Amorim-a dawhtheihna chu a zo ta niin a sawi.
Onana hi Ningania Lyon nena 2-2-a an inhnehtawk tuma an goal chhuah kha a tihsual ve ve a ni.
Season liam ta atanga thlir letin kum 29 mi hian tihsual vawi riat a tihsual avangin goal an chhuah tawh a, Premier League club-a keeper zingah tihsual ngah ber a ni.
Kum 2023-a Feberbahce atanga £ maktaduai 4.3-a an lak luh, Bayindir-a chu a aiawh tura thlan zui niin Premier League-a inkhel bul a tan vawi khatna a ni.
Kum 26 mi hian he hun remchang a neih hi tha taka hlen a duh ang tih a chiang a; mahse, Newcastle-in goal zawna vawi ruk an petah vawi li a chhuah a, tihsual a nei bawk.
Inkhelh chhungin vawi 57 ball a pe a, heng zinga 27 (47.4%) chiah a pe dik bawk a, a khel tha lo tih ngam a ni.
A keeper rinrawl pahnih dinhmun hetiang a nih lai hian Amorim-a hian Lyon an khelh leh hunah tu nge a hman zawk dawn sawi lawk a har ta a. “Kan nghak ang a, kar thar intan sela, kan khelh leh hun atan starting XI tha ber tur ka thlang ang,” a ti.
Hetih lai hian England goalkeeper thin, Paul Robinson-a chuan Onana a la chawlh a ring a. “Lyon lakah hian a la inlan loh ka ring,” a ti.