Aizawl: Ram chhung hmun dangte rualin nimin khan Fire Service Day/Martyrs Day chu Mizoramah pawh hman a ni.
Martyrs Day/Comemmoration Day Parade hi Aizawlah chuan Fire & Emergency Services Headquarters, Hunthar Vengah zing dar 7 khan hman a ni a. Aizawl pawn lama Fire Station-te chuan zing dar 9-ah anmahni hmun theuhah an hmang ve thung.
Martar-te sunna hunah hian kangthelhnaa leh duty kaihhnawiha thite sun nan minute khat ngawi renga dingin hun hman a ni a. An pual hian martar thlanah pangpar dah a ni bawk.
April 14, 1944 khan indolawng lian, ralthuam leh bomb lam chi phur ‘S.S Fort Stikine’ chu Mumbai a thlenin a kang a. He kangmei chhuakah hian Bombay Fire Brigade mi 66 leh Bombay Salvage Corps mi 11 kangthelhtute chu an thih phah a. A hriatrengna atan Fire Service Day hi April 14-ah hian hman a ni ta a ni.
April 14- 20 chhung hi Fire Service Week atan hman a ni thin a. Sorkar laipui chuan rampuma hman turin, kumina Fire Service Week thupuiah ‘Unite to ignite, a fire safe India’ tih a thlang.
Fire Service Week denchhen hian Fire Station tinten hospital/nursing home pakhat leh school pakhat zel kangmei chhuah thulha a him leh him loh an endik dawn a. Fire Station zawng zawngin an huam chhung hnaivaiah sikul thlan bik neiin Fire Safety Lecture & Mock Drill hi sikul thuneitute nen inberawnin an buatsaih bawk ang.
He week denchhen hian F&ES-a thawk mi panga – Leading Firefighter J. Zoliana, Siaha FS; Firefighter H Lalthlamuana, Vairengte FS; Firefighter S. Lalremruata, F&ES Hqrs; Firefighter L. David Vungzaliana, Khatla FS leh Driver Special Grade Thangchhuana, Kolasib FS te chu Director General, Fire Service, Civil Defence & Home Guard, MHA, Govt. of India chuan an hnathawh that avangin Bronze Disc & Commendation Certificate dawng turin a thlang a ni.