Engatinge Indian mi thenkhatte hian ramdangmi (foreigner) thlalakpui nuam an tih em em thin le? He zawhna hi vawi tam a ri tawh a, social media platform hrang hrangah pawh a ri chuah chuah thin. A reh mai dawn lo lehnghal!
Mahse, tun thleng hian chhanna fum fe leh pawm nuam angreng tak a awm chuang lova, pawmdan a inang lova, hmuh dan a dang bawk. Heti chung hian ramdangmi, a bik takin vun ngo kan tih mai ngaihsanna hri hi a reh tak tak thei lo niin a lang.
Kum 2017 daih tawh khan khatih laia union minister of state (tourism) KJ Alphons chuan Indian mipuite hnenah ngenna siamin, ramdangmi te chu zar buai lo turin a ti a, thlalakpui lek phei chu mimal zalenna inrahbehsakna a ni, a ti hial.
Mahse, heti chung hian a ngenna leh sawmna hian awmzia a nei chuang lova, ramdangmi thalakpui leh selfie pui duhna thlarau chu Indian mi tam takte thisen zungzamah a bet tlat tawh.
Hetihlai hian khawvela YouTuber lar leh hriathlawh ber pakhat chuan kum thum vel kalta khan India leilung a rawn rap a, a thil tawn a ziah chuan mi tam tak a barakhaih a, dawnsawn dan a pui miah miah hle.
MrBeast (Jimmy Donaldson) hi YouTube-ah milar tak niin, subscriber maktaduai 103 chuang a nei mek a, a video te’n en an hlawhin, hlut an hlawh.
Kum 27 mi American YouTuber hian India ramchhunga a kal velnaa a thil tawn heti ang hian a ziak:
“India rama ka vahvelnaah mi pakhat hian thlalakpuiah min sawm a, chutah ka tawnglettu hnenah chuan ‘MrBeast video a duh ber’ zawt turin ka ti a, ‘MrBeast a hriat reng reng loh thuin’ a chhang ta thung a, Sap mingo sang tak thlalakpui a duh vang mai a nih thu chu an tawpkharna a ni deuh ber mai,” a ti.
Hemi chungchang hi social media lamah dahchhuah niin, chai a hlawhzui map map hle.