ZPM Thalai General Headquaters hruaitute chuan nimin khan Aizawl Press Club-ah thu thar thehdarhtute an kawm a. Ruihhlo tawlhtu hnen atanga ZPM-in pawisa dawng anga mi thenkhatin an puhna chu an ngaih thutak thu an sawi a. Nimin khan Henry Lalbiakzinga Chhundeng leh ZPM, minister leh party hruaitute inzawmna nei anga puhtute lakah FIR an theh lut.
ZPM Thalai headquarters Vice President Rokhuma chuan tun hnaia heroin kg 4.722 (hawng 440) kaihhnawiha man, Henry Lalbiakzinga Chhundeng nena ZPM-in inzawmna nei ang leh politics chhe mi, Mizoramah awm tawh lo se an tih hmanga dawt thu phuahchawpa ZPM minister leh party hruaitute tihhmingchhiat tumna tenawm tak chu tha an tih loh thu sawiin, “Thu belhchian dawl lo thehdarhtute hi a tawp thlenga dan hmanga umzui kan tum,” a ti.
Ram hlui zia politics changchawituten thlalak hlui hrang hrang zawng khawma zeldin thubawla dawt phuahchawp hmanga mipui rilru hruai kawi thei tura social media-a thu an vawrh darh chu an ngai thu tak tih sawiin Rokhuma chuan, “Ruihhlo tawlhtu hnen atanga ZPM-in pawisa an dawng anga inpuhna phei hi chu ngawih bopui chi-ah kan ngai lo a ni,” a ti.
Rokhuma chuan dawt thu hmanga minister-te leh ZPM party beihna hi intihhmingchhiat tumna ni ngeia an ngaih avangin mipui hmaah thu dik hai lan a nih theih nan dawta ZPM beitute lakah FIR an thehlut tih a sawi.
ZPM Thalai vice president chuan ZPM kaihhruai sorkarah Mizoram police leh excise department hian tun hma pawhin a hlawm lianin heroin hi an lo man fo tawh a, media hmaah minister-te hian hmingthat lak tuma thupuan emaw, sawifiah emaw an nei ngai lo va, sorkar hmasaah pawh a awm an hriat ngai loh thu sawiin, “Department-in thu an chhuah bak chu media hmaah hetiang thil hi an sawi fiah zui ngai lo. Tun hnaia heroin hawng 440 manah pawh a mantu police department-in an thuchhuah hmanga an puang zar hi thil kalphung pangngai a ni a, police-in a chhui hna an thawh zawh rualin court chin fel turin an theh lut thin a ni,” a ti.
Rokhuma chuan Mizo thalaite nun tichhetu, ram leh khawtlangin a buaipui, ruihhlo tirem tura home deparment, excise & narcotics department leh Central YMA ten thawhhona tha tak nei a, huai tak leh chak taka an hmalakna chu fakawm a tih thu a sawi a. ZPM kaihhruai sorkarah dan lova kuhna tawlh ruk titawp turin beihpui thlak a nih mek thu leh ruihhlo tirem turin chak taka hmalak a nih thu a sawi a. Kuhva leh ruihhlo tawlh ruk man tura Mizoram Police leh excise-te ministry atanga an kut phuarsakna awm lova huai tak leh thahnemngai taka ram damna tura an hmalaknah chu chhuanawm an tih thu a sawi bawk.
Thu thar thehdarhtute an kawm zawh hian ZPM Thalai chuan Aizawl Police Station-ah FIR an theh lut a ni.