Kum tawp lama Bihar assembly inthlan lo awm turah politics thil vir vel a awm tan mek zel a, Rashtriya Lok Janshakti Party (RLJP) chief, union minister hlui, Pashupati Kumar Paras-a chuan an party-in BJP kaihhruai National Democratic Alliance (NDA) an chhuahsan thu a puang.
Thawhtannia Patna-a Ambedkar Jayanti an lawmnaah Paras-a hian hei hi a puang a. “Kum 2014 atangin BJP leh NDA nen kan thawkho tawh a; mahse, vawiin atang hian NDA nen inzawmna kan nei tawh lo,” a ti.
Paras-a hian an party chuan Bihar-a assembly bial 243 chu anmahniin an chuh dawn tih a sawi nghal a, heti a nih chuan RLJP hi an state politics-ah sorkar dinna tura pawimawh tak an ni thei dawn tihna a ni.
“Bihar mipuite hian an rilru hi Nitish Kumar-a kaihhruai NDA sorkar thla duhna hi an pu tawh a ni,” a ti a. District 22 tlawh tawhin a bul atangin mite tiphur turin a bei tih a sawi a, a tlawh hmabak district 16 pawh a la tlawh zel dawn tih a sawi.
Paras-a hian Chief Minister Kumar bei zuiin Dalit duh lotu leh ‘rilru damlo’ tiin a sawi a, Dalit-te lakah pawikhawihna a tam hle tih a sawi bawk.
Tun hnaia Aurangabad leh Rohtas-a thil thlengte pawh sawiin state sorkar chuan engmah a ti lo niin a sawi bawk.
“March 14-a Holi-ah khan Aurangabad district-ah Komal Paswan-i chuan a thiante nen Holi an lawm a, Lok Janshakti Party Ramvilas hruaituin a bike-in a su thlu a. A hliam tuar lovin a thi zui a. Mak tak maiin Nitish Kumar-a sorkar chuan chet a la miah lo,” a ti.
Rohtas district-ah pawh Ranjit Paswan-a chu police officer-in a kap hlum a, hetah pawh Nitish Kumar-a sorkar chuan a titu lakah engmah a ti chuang lo niin a sawi.
Paras-a hian sorkar laipui chu Ramvilas Paswan-a hnenah Bharat Ratna pe tura tiin ‘Ambedkar-a pahnihna’ a nih thu a sawi.
“Ramvilas Paswan khan a dam chhungin Dalit dikna chanvo atan a bei a, ram chhunga civil mite chawimawina sang ber hi a phu a ni,” a ti.