Aizawl: Chief Minister Lalduhoma chuan art hi culture nen an inzawm tlat a, hnam nihphung, nunphung leh zia zawng zawngte chumite hnam art-ah chuan a lo lang chhuak thin tih a sawi.
Thawhlehni khan I&PR Mini Theatre-ah Mizoram sorkar leh International Association of Art – India (IAA) tangkawpin World Art Day 2025 lawmna leh a puala National Art Exhibition a buatsaih a hawnnaah chief minister, IAA Mizoram chief patron ni bawk chuan ziak leh chhiar mumal taka an hriat hma pawhin lemziak hmangin mihringten an chanchin an lo ziak tawh a, Mizote ngei pawhin A Aw B an neih hma daih khan a lem hmangin thil an lo ziak thin a, lungphunah an hmu thin tih sawiin, “Chungte chu kan hnam art innghahna pawimawh a chang ta a ni,” a ti.
Chief minister chuan art leh hnam ze inkungkaih thukzia an hriat avangin UNESCO chuan IAA chu official partner-ah hmangin art hmangin khawvelah inunauna te, remna leh muanna te thlentirna hmanruaah leh mipuite zirtir nan a hmang a, world heritage site-te a puangin hmalakna eng emaw zat a nei tih a sawi.
Lalduhoma chuan Mizoramin ram dang leh hnam dangte hriat a hlawhna lian ber pawh art & culture-te an nih thu a sawi a. Mite hriat hlawh tur leh khualzin hip turin ram mawi tak leh hnam ze duhawm tak te, culture tinreng hi visual art hmanga pho chhuah thiam a ngai a. Chumi kawngah artist-te an pawimawh thu a sawi a. Mizo film siamtu leh chang thintute, lemziak thiam te, photographer leh zai thiam bakah lam thiamten hma an sawn nasa a. Rimawi lamah hian, hnam dang rimawi hman kawngah sang hle tawh mah se, hnam rimawi hmanrua – phenglawng, tumphit, rawchhem, bengbung, Mizo tingtang hrui khat nei leh a dangte hi an kalsan ta deuh nia a hriat thu sawiin Mizo rimawite hmang uar turin kalkhawmte a chah.
He hunah hian patron pahnih, Art & Culture Minister C Lalsawivung leh I&PR Minister Dr Vanlalthlana te chu khualzahawm niin thu an sawi a. IAA India President Manaj Saha pawhin thu a sawi bawk.