Aizawl: PWD Minister Vanlalhlana chuan kawng tha leh tlo nei tur chuan a nihna tur ang taka kawng siam a pawimawh tih a sawi.
Thawhlehni khan Secretariat Conference Hall, MINECO-ah PWD Minister Vanlalhlana kaihhruaiin Aizawl khawpui chhung kawng thawm that zelna tura ruahmanna leh hmachhawpte sawi hovin coordination meeting an thukhawm.
PWD minister chuan kawng chu mi zawng zawng intawm a nih angin a enkawl leh dimdawi kawngah pawh mi tinin mawhphurhna an neih thu a sawi a. Kawng tha leh tlo nei tur chuan a nihna tur ang taka kawng siam a pawimawh bakah, kawngpui behchhana hna kalpui ngai thin department-te nen thawhho a pawimawh thu a sawi.
He huna tar lan a nih danin Aizawl khawpui chhung kawng thawm that hna hi thuang hniha kalpui tur niin Aizawl Road North Division hnuaiah Km 44-a thui leh Aizawl Road South Division hnuaiah km 40-a thui thawm that tura tih a ni a. Aizawl khawpui chhung kawngpui tam zawk hi Bituminous Concrete (BC) hmanga thawm that tum niin, Thuampui leh Selesih kawng bikah hi chuan rigid pavement-a siam that tum a ni ve thung dawn.
M/s Nidhi Creative Infrastructure Ltd.-ten Engineering, Procurement & Construction (EPC) Mode-in thla 18 chhung an thawk ang a. BC atan a hman tur bungrua hi Cachar leh Rawpuichhip atanga lak tum a ni a. Nizan atang khan a thawh khatna atan Bawngkawn – Chanmari inkar hna hi an thawk tan dawn a ni.
He hunah hian PHE Department, P&E Department, Aizawl DC, Superintendent of Police (Traffic), UD&PA Department, Transport Department, Aizawl Municipal Corporation, SIPMIU, Aizawl Smart City Limited bakah Central YMA leh Aizawl City Local Council Association aiawh te an tel.