Assam Chief Minister Himanta Biswa Sarma chuan Thawhlehni khan Waqf dan siam that duh lohna lantir chu a sorkar chuan an phal lo tih a sawi.
Mite chuan dan thar hi an duh lo thei a, an thlawp thei bawk a; mahse, khawlaia chhuaka lungawi lohna leh duh lohna lantir ang chi chu an phal lo tih a sawi.
Assam-ah hian state laili leh khawthlang lam hmun thenkhatah dan thar duh lohna lantirtu mi eng emaw zat chu police-in an lo hreng tawh a. Guwahati-ah Waqf (Amendment) Act duh lohna lantir hi neih tuma ruahmanna pawh a awm mek.
AAMSU chu heng lungawi lohna lantir huaihawttu an ni.
Pathianni khan Assam chhim lama Silchar-ah chuan dan thar duh lohna lantir nan kawng zawh niin tharum thawhna a thleng zui a. Kawng zawhte hian anmahni hnawh darh tumtu police-te chu an lungin an tawng a ni.
An state thenawm, West Bengal-ah chuan Waqf dan thar duh lohna nasa taka lantir niin tharum thawhna pawh a thleng nasa hle a, mi pathum thi awm tawhin mi tam takin an in leh lo an chhuahsan phah tawh.
Sarma chuan an state-ah hetiang hi a thlen an duh lo tih sawiin dan duh lotute chu khawlaia duh lohna lantir lovin Supreme Court-ah kal turin a ti a, petition lut tam tak a awm tawh a, hengte hi Nilaini khan ngaihtuah tan a ni nghe nghe.
“A thlawp zawng emaw, a duh lo zawng emawa sawi duh kan neih chuan court-ah kan kal thei reng a. Judge-te nen tih dan pangngaiin a sawiho theih a ni,” a ti.
“Mi thenkhatin dan hi an duh loh chuan mi dangin lo thlawpin khawlaiah an lantir thin a, inbeihna a chhuak mai thin. Assam-ah chuan inbeihna leh buaina kan duh ve lo va, kan inunauna hi tha taka kengin kan state hi hmasawn turin i kalpui zel ang u,” a ti.