Aizawl: Siaha bialtu MLA Dr. K.Beichhua chuan sorkar ang pawh hian hmasawnna hna hi a tam thei ang ber sorkar department hrang hrangten convergence-in an thawh a tul tih a sawi.
Nilaini zingkar khan Siaha District Joint Village Council-te sum thawhkhawm leh MLA fund atanga Siaha bazar leh Meisatla inkar kawngpui tihzauh hnathawh mek chu bialtu MLA Dr K Beichhua’n a hmunah tlawhin, a enfiah.
Bialtu MLA Dr. K. Beichhua chuan Siaha district Joint VC-te hmalakna chu tha a tih thu leh lawmawm a tih thu a sawi a, kawngpui zauhna atana zangnadawmna phut lova phal taka ram petute chungah lawmthu a sawi nghal bawk.
Dr. K. Beichhua chuan Joint VC-te thawhkhawm leh MLA fund atanga hnathawh hi a zawngchhang thlak hle tih sawiin, “Tun sorkarah kan sum dinhmunin duhthu a sam lo va, hmasawnna hnathawh a harsa hle a, chutiang a nih avang chuan works tlem tlem a thawhna turte hi a theih chin chinah convergence a kan thawh hi a tul hle. MLA LAD fund te pawh chutianga hman chuan a hlawk viau a ni,” tiin, Siaha Joint VC te nen thawhhona tha tak an neih thu leh an hma lamah pawh inlungrual taka khawtlang leh ram tan chak taka hmalak zel chu an thupui ber a nih thu a sawi.