Aizawl: Mizo Zirlai Pawl (MZP) General headquarters hruaitute chuan nimin khan Thaidawr tlang, Phuldungsei, Mizoram chhunga Tripura sorkarin kut an thlakna hmun tlawhin an enfiah; hnathawktute chu an hna titawp nghal turin an hriattir.

MZP hruaitute chuan Mizoram chhunga Tripura sorkarin kut a rawn thlak fo hi hriatthiam har an tih thu an sawi a; helai hmun a hmalakna zawng zawng hi titawp nghal turin a hmun a hnathawktute hriattir a. Mizoram sorkar pawhin Tripura sorkar hi a rang lama an hmalakna zawng zawng titawp tura hriattir turin a ngen nghal.

Mizoram sorkarin Thaidawr tlang panna kawng link road laih tlang pawh sorkar hian ngaihven zui nghal vat turin a ngen bawk.

MZP hruaitute hi Phuldungsei Village Council hruaitute leh Mizo Convention: Youth Wing, Jampui Hills ten an tawiawm a ni.

Hna chawlhsan nghal turin Mizoramin Tripura hriattir

Mizoram sorkar chuan Thaidawr tlang, Phuldungseia hnathawh mek chawlhsan nghal turin nimin tlai khan Tripura North district thuneitute a hriattir.

Home Minister K Sapdanga hnen atanga thudawn danin, Mizoram sorkar chuan Thaidawr tlanga Tripura sorkarin hna an thawk hi Mizoram sorkar chuan tha a ti lo. Chuvangin, nimin tlai khan Tripura North district thuneitute chu hnathawh chawlhsan tir nghal tura hriattir an ni a, hnathawh hi chawlhsan a ni tawh.

Mizoram sorkar chuan district level-a inbiak phawta, a tul a nih chuan state level thlenga inbe chhunzawm turin ruahmanna a siam.