Central YMA, MHIP, MZP, MSU leh ZoRO aiawhten zalen taka ramria inkalpawh theihna (free movement regime) leh ramri hung (border fencing) chungchangah a tul anga a ram mipuite ngaihdan leh duh dan ngai pawimawh thiam turin an ngen laiin union home secretary-in dodal lo hram turin a ngen thung.
Thawhlehni tlai dar 6:30 khan Mizorama NGO aiawhte chuan sorkar laipui home ministry ruahmannain Ministry of Home Affairs North Block, New Delhi-ah Union Home Secretary Govind Mohan an kawm a. NGO hruaitute chuan free movement regime (FMR) leh border fencing chungchangah NGO Co-ordination Committee anga ngaihdan awm sa sawi chhuakin a tul anga a ram mipuite ngaihdan leh duh dan ngai pawimawh thiam turin an ngen.
Union home secretary chuan Mizoram leh Myanmar inkar hung tura hmalaknaah NGO hrang hrangte thlawpna an beisei tih sawiin dodal lo hram turin a ngen thung.
NGO hruaituten Aizawla Union Home Minister Amit Shah a zin laia a sawi, Airport Authority of India (AAI) kuta Lengpui Airport hlan chungchang hmalak tawh dan an zawhna chhangin union home secretary chuan Mizo mipuite duh dan anga AAI kuta airport hlan tura an lo sawi tawh angin hma an lak mek thu a sawi a. Mizoram chief secretary chu proposal siama a rang lama theh lut tura an hriattir tawh thu leh an intiam tawh anga thla thum chhung ngeia hma an lak hman tur thu a sawi.
Mizorama ruihhlo hluar chungchangah union home secretary chuan a vei thu leh Mizo mipuiten nasa taka an do chu lawmawm a tih chu sawiin, sum leh pai leh hmanrua a tul apiang hemi kawnga hmalatute an puih tur thu a sawi a. Narcotics Control Bureau (NCB) kaltlanga an puih tur thu a sawi.
NGO hruaitute chuan tun hnaia foreign ram hrang hrang atanga Mizorama zin tumten harsatna an tawh nasat thu leh Mizoram luh phalna dan mumal lo chungchangah hmala turin an ngen angin home secretary chuan Mizoram luh phalna P.A.P awlsam zawka lak a nih theih nan ruahmanna a siam nghal tur thu leh a en zui turin Intelligence Bureau Joint Secretary (NE) a ruat nghal thu a sawi.
Mizo thalaite sipaiah a tam thei ang ber an luh theihnan ruahmanna siam turin an ngenna pawh union home secretary chuan Central Armed Police Force-ah Mizo thalai a tam thei ang ber an luh theih nan batallion thar din turin hmalak mek a nih thu leh thla thum hnuah lak tan theih an inbeisei thu an sawi bawk.
An inkawmnaah hian union home secretary hi Director, IB; Secretary, Border Management; Advisor, NE; BSF leh Narcotics Control Board bakah Assam Rifles DG theuhte, Jt. Secy. leh Addl. Secy rualten an tawiawm a ni.