Aizawl: Health Minister Lalrinpuii chuan damdawi lei leh hralh kawnga pharmacist-te tih turte hlen turin sorkarin chak takin hma a lak mek thu a sawi.
Nilaini chawhnu khan health minister leh Pharmacy Council of India President Dr Montukumar Patel te inkawmin Mizoram chhunga pharmacy profession chungchang an sawi dun.
An inkawmnaah Dr Patel chuan wholesale leh retail-a damdawi hralh kawnga danin a phut pharmacist-te mawhphurna chu a taka kenkawh tha a tih thu a sawi a. State sorkarin ram a pek theih chuan Pharmacy Skill Development Centre building tur an sak sak theih thu a sawi bawk.
Minister chuan a rang thei ang bera bawhzui a lo tum thu a lo hrilh bakah damdawi lei leh hralh kawnga pharmacist-te tih turte hlen turin sorkarin chak takin hma a lak mek thu a hrilh.
Mizoram thalaite zingah damdawi hman sualna a tam thu sawiin Lalrinpuii chuan, drugs control lama chak zawka hmalak an tum thu a lo sawi a. Mizoramin Pharmaceutical Company-te a neiha damdawi tha leh rintlak a siam chhuah ve theih nan hmalak a duh thu sawiin, hemi tur hian Mizoram pharmacist-te thawhpuiah a sawm bawk.