BJP Mizoram State Core Group member Dr K Beichhua, MLA chuan Mizoram politics thlirin BJP Mizoram hian mawhphurhna sang tak an nei mek niin a sawi.
Thawhtannia BJP Mizoram State Office, Mipui Rûn, Upper Republic ah chawlhkar thar inhlanna leh Political Session hun buatsaiha thusawitu BJP MLA Dr K Beichhua chuan Union Home Minister Amit Shah-a’n Union Minister of State for Home changtu Nityanand Rai chu an khawtualah tirin Siahaa hruaitu hrang hrangten an mamawh leh duhte an lo thlen a. Rai chuan a tihsak ngei a rinawm a, tunah chuan Shah-a’n a koh hun nghakin an awm mek tih a sawi.
Dr K Beichhua chuan Mizoram politics-ah BJP MLA a ni chu boruak tlachham dawn dawnin lang mah se, kum khat leh a chanve vel an kal takah BJP MLA nih a nuamin boruak khamkhawp an hmu thei tawh tih a sawi.