Croatia international thin, Nikola Pokrivac chu an rama car chesualah Zirtawpni khan a thi tih Croatian Football Federation-in a puang.
Kum 39 mi midfielder hi Dinamo Zagreb, AS Monaco leh RB Salzburg tana khel thin niin an ram tan kum 2008 leh 2010 inkar khan vawi 15 a khel ve bawk.
Pokrivac-a hi kum 2015 khan Hodgkin’s lymphoma a nei tih hriat chhuah a ni a, inkhelh a chawlhsan zui phah.
Kum 2021 khan amateur football-ah kir lehin league hniama khel mek, NK Vojnic chu nipui khan a zawm.
Tual chhung chanchinbute chuan NK Vojnic tana a khelhpui mi pathum nen Croatia lailia Karlovac khuaa lirthei pali insutnaah a thi niin an tar lang.
Car danga chuang kum 42 mi a thi bawk a, Pokrivac-a chuanpuite pawh hliam na tak tuarin damdawi inah an awm bawk.
Croatian Football Federation President Marijan Kustic-a chuan an ui thu a sawi a. “Football tan a uiawm a, a bikin a chhungte tan a na hle a ni,” a ti.
Pokrivac-a hi Euro 2008-ah khan inlanin hemi tum hian Croatia hian quarter-final an lut a. 2010 World Cup qualifier-ah pawh a inlan bawk.